Llyfrau blwyddyn 'Barddas'
Mae cylchgrawn Cymraeg wedi achub y blaen ar feirniaid swyddogol Llyfr y Flwyddyn trwy gyhoeddi ei restr hir ei hun o lyfrau'r flwyddyn.
Gyda'r rhestr hir swyddogol i'w chyhoeddi fis Ebrill mae yn y rhifyn diweddaraf o Barddas restr o ddeg o lyfrau wedi eu dewis gan aelodau Barddas.
Gofynnodd y golygydd, Alan Llwyd, i 18 ddewis eu tri hoff lyfr ac wedyn lluniwyd rhestr derfynol wedi ei sylfaenu ar y dewisiadau hynny.
Y dewiswyr oedd; Dai Rees Davies, J Elwyn Hughes, Wil Lloyd Griffith, Iolo Wyn Williams, Robin Gwyndaf, Cynan JonesD Islwyn Edwards, Tony Bianchi, Aled Lewis Evans, Dafydd Williams, Dafydd Evan Morrios, Annes Glynn, Ifor ap Dafydd, John Glyn Jones, Cen Williams, Dafydd Morgan Lewis, Norman Closs Parry a Hywel Griffiths, a cheir sylwadau difyr ganddynt am eu dewisiadau.
Wedi'r prysur gyfrif Petrograd, nofel Wiliam Owen Roberts, sydd ar ben y rhestr - nofel a gyhoeddwyd gan gymdeithas Barddas fel pump o gyfrolau eraill y rhestr o ddeg.
Dyma'r rhestr gyflawn:
- Petrograd gan William Owen Roberts ( Barddas)
- Prifysgol y Werin: Hanes Eisteddfod Genedlaethol Cymru 1900-1918 gan Alan Llwyd (Barddas)
- Nawr gan T James Jones (Barddas)
- Teulu Lord Bach gan Geraint Vaughan Jones (Gomer)
- Yn Hon Bu Afon Unwaith gan Aled Jones Williams (Bwthyn)
- Llyfr Glas Eurig gan Eurig Salisbury (Barddas)
- Plu gan Caryl Lewis (Lolfa)
- Byd Go Iawn Un Nos Ola Leuad gan J Elwyn Hughes
- O Ran gan Mererid Hopwood (Gomer)
- Bore Newydd gan Myrddin ap Dafydd (Carreg Gwalch) a Hanner Amser gan Nigel Owens (Lolfa) yn gydradd.
Bydd yn ddiddorol iawn cymharu'r rhestr hon gyda'r un a gyhoeddir gan Gwyn Thomas, Luned Emyr a Derec Llwyd Morgan nos Fercher, Ebrill 22 2009.
Petrograd - adolygiad Kate Crockett.
