Cyfrol yr amcanion da
Yn syth ar ôl eu cyhoeddi mae Rhestr Testunau Eisteddfod Genedlaethol Cymru Blaenau Gwent a Blaenau'r Cymoedd 2010 yn ail ar siart gwerthwyr gorau Cyngor Llyfrau Cymru .
Mae hon bob amser yn gyfrol â diddordeb mawr ynddi wrth i ddarpar lenorion a phrifeirdd ei phori am rywbeth i gystadlu arno a dod a bri iddyn nhw yn ystod wythnos gyntaf Awst y flwyddyn ganlynol.
Yn hanes y rhan fwyaf ohonom swm a sylwedd yr ymarferiad yw rhoi croes wrth ochr ambell i destun addawol a sylweddoli yn gynt na'r disgwyl ei bod hi'n ddiwrnod olaf anfon yr ymgeision yfory a chwithau heb ddechrau'n iawn heb sôn am fod yn barod i anfon.
Diau y bydd eraill yn chwilio a chwalu mewn droriau a thrwy silffoedd am 'hen gesig' a gollodd yn y gorffennol y gellid eu hanfon eto dan deitl newydd.
Mae beirniaid rheolaidd a beirniaid a fu'n pori'n gydwybodol drylwyr drwy Gyfansoddiadau'r gorffennol yn adnabod y rhain yn syth, wrth gwrs,
Y pedair cystadleuaeth y mae'r prif ddiddordeb ynddyn nhw, mae'n debyg, ydi'r Gadair, Y Goron, Y Fedal Ryddiaith a'r Daniel Owen - sy'n gofyn bob amser am nofel - a'r testunau ar gyfer Glynebwy eleni yw:
- Awdl - Ennill Tir
- Casgliad o Gerddi - Newid
- A chyfrol o ryddiaith dan y testun Adfywiad am y Fedal Ryddiaith.
Fe ddywed cystadleuwyr selog wrthych bod dewis eich beirniaid cyn bwysiced a'ch dewis o destun ac yn y ddwy gystadleuaeth fawr Robat Powell, Elwyn Edwards ac Idris Reynolds a Mererid Hopwood, T James Jones ac Iwan Llwyd fydd angen eu plesio.
Bodloni Elfyn Pritchard, John Gruffydd Jones a Caryl Lewis fydd raid i ymgeiswyr y Fedal Ryddiaith .
Cystadleuaeth lenyddol hynod boblogaidd bob blwyddyn yw un yr Englyn wrth gwrs. Dysgwr yw'r testun yng Nglynebwy a'r beirniad yw Tudur Dylan Jones.
Ar gyfer Y Bala eleni anfonwyd 75 o englynion i'r gystadleuaeth a 42 i'r gystadleuaeth englyn ysgafn.
Ond un syndod mawr yn Y Bala yw'r nifer sydd wedi ymgeisio am y Goron - 44 i gyd o gymharu â saith am y gadair ac wyth am y Fedal Ryddiaith a saith am Wobr Goffa Daniel Owen.
Heb os, enillydd y Goron fydd yn teimlo iddo wneud y diwrnod gorau o waith yn dod yn gyntaf o blith cynifer.
