Elfennau'r wledd
Gyda llifddorau'r gweisg yn llithro'n agored o un i un mae bwrlwm llyfrau'r Nadolig yn prysur olchi drosom ni.
Yr anhawster fydd dewis o blith yr holl lyfrau newydd fydd ar gael ac fel pob Dolig mae cyhoeddiad Cyngor Llyfrau Cymru yn darlunio'r holl gyfrolau sydd ar gael, Gwledd y Nadolig - ac yn y Saesneg, Books from Wales.
O frasgyfrif, rhyw ddeugain o'r llyfrau sy'n newydd sbon danlli ar gyfer y Nadolig gyda dwsin o'r rheini yn gofiannau neu hunangofiannau gyda llyfrau Felix Aubel, Ned Thomas a Huw Griffith y tri mwyaf nodedig yn eu plith i'm meddwl i.
Er bod prinder nofelau mae yma ddau begwn gyda Lladd Duw, nofel ddiweddaraf Dewi Prysor ar yr aswy law fel petai a ±Ê¾±±ð³Ùà , nofel hanes gan Gwen Pritchard Jones - am y gantores Maria Stella Petronilla y ferch 13 oed o'r Eidal a briododd Arglwydd Niwbwrch plas Glynllifon ac yntau'n 50 oed - y pegwn arall.
Ond daw cyfle i ddidoli a rhestru goreuon yn nes ymlaen digon yw dweud yn awr y bydd Gwledd y Nadolig yn 16 dalen anhepgor ar gyfer y rhai sy'n dewis ac mae'n cael ei ddosbarthu trwy bapurau bro Cymru yn ystod y mis hwn a'r mis nesaf a'r atodiad Books from Wales yn y Western Mail heddiw, Rachwedd 12.
Mae copïau hefyd ar gael am ddim mewn siopau llyfrau, ysgolion a llyfrgelloedd.
Tenau yw'r wybodaeth am y llyfrau yn y cyhoeddiadau ond maent yn fynegbyst buddiol ac, wrth gwrs, gellir troi at wefan y Cyngor Llyfrau am wybodaeth lawnach.
Hwyl ar y prynu, hwyl ar y darllen . . .
