Ö÷²¥´óÐã

Ar ôl bod yn astudio yn y coleg yng Nghaerdydd - a phicio draw i Baris yn achlysurol hefyd - mae hi rŵan a'i bryd ar Efrog Newydd, ac yn bwriadu mynd yno ddiwedd Awst i goleg Juilliard.

O'n i'n ei holi os oedd hi am fynd â'i thelyn ond 'na' oedd yr ateb gan y byddai hynny'n costio tua dwy fil o bunnau!!

Piano Rwsia
Anhygoel - dyna'r unig air i ddisgrifio cystadleuwyr yr unawd piano, Talis Spence, Geraint Llyr Owen a Charlie Lovell-Jones. Fe gafodd Talis ei magu yn Rwsia, ac yno y dysgodd hi ganu'r piano cyn dychwelyd i Gymru ddwy flynedd yn ôl.

Mae'n bosib bod dilynwyr You Tube yn gyfarwydd a Geraint Llyr Owen - gan fod 'na ffilm ohono yn canu yn fanno, ac o ganlyniad i hynny fe gafodd ei wahodd i ganu ar Broadway!

Ac mae Charlie yn aelod o Gerddorfa Ieuenctid Prydain, ac yn bwriadu treulio'r haf yn cael gwersi cerdd 'dwys' yn Ne Ffrainc. Anhygoel!

Seren
Un o sêr y diwrnod i mi heddiw oedd Iwan Davies o Ysgol Rhydywaun a fo enillodd ar y llefaru unigol.

Dyma hogyn annwyl (er ei fod yn cefnogi Arsenal). Mae o'n gyfarwydd iawn â pherfformio ar y llwyfan gan iddo ymddangos yn y cynhyrchiad teithiol diweddar o'r Sound of Music - yn actio un o'r plant sef Kurt - hefo Connie Fisher.

Beics
A thra dwi'n sôn am Ysgol Rhydywaun, mae'n rhaid cyfeirio at eu llwyddiant yng nghystadleuaeth y cyflwyniad dramatig dan 19 oed. Y llynedd roedd criw Rhydywaun yn defnyddio meinciau hir o'r ysgol ar y llwyfan, felly be tybed fyddai ganddyn nhw ar y llwyfan eleni?

Wel, fe ddaeth 'na tua chwech o feics i'r llwyfan i bortreadu y chwyldro yn Sgwâr Tianamen ac roedd hwn yn bortread dramatig llawn lliw a chyffro.

Llongyfarchiadau mawr i'r ysgol a'r athrawes hynod greadigol, Rhian Staples. Duw a ŵyr be gawn ni flwyddyn nesa!

Ddim yma
O'n i wedi clywed si na fyddai un aelod o ensemble Ysgol Gyfun Gartholwg yma ar gyfer y gystadleuaeth ensemble lleisiol - a doedd o ddim yma chwaith.

Lle oedd o felly? Sâl? Ar ei wyliau?

Y rheswm nad oedd Jay Worley yma oedd oherwydd ei fod yn cael llwyddiant mawr ar hyn o bryd mewn cystadleuaeth arall - Britain's Got Talent.

A phob lwc iddo yn y gystadleuaeth honno.

Ond ta waeth, aeth gweddill y criw yn eu blaen i ennill y wobr gyntaf, a llongyfarchiadau mawr iddyn nhw ar eu perfformiad operatig a hwyliog.

Gwres y ddawns
Mi roedd hi'n boeth iawn ar y llwyfan heddiw, a'r rhai oedd yn dioddef waethaf oedd y dawnswyr. Mi ges i sgwrs hefo Anwen, Sara a Siwan oedd yn cystadlu ar y ddawns werin bl 7,8,a 9, ac mi roedd y tair ohonyn nhw yn edrych yn bictiwr.

Roedd Anwen yn awyddus iawn i gael diolch i Mam-gu a Tad-cu am brynu'r wisg binc (o ddeunydd Melin Tre Gwynt - fel un Sara) yn bresant Nadolig iddi.

Diwrnod llwyddiannus
Linda Morris oedd yn arwain corau Ysgol Dyffryn Conwy heddiw, ac fe gawson nhw ddiwrnod llwyddiannus iawn.

Ond i Linda roedd 'na dristwch gyda'r gorfoledd gan fod Linda yn rhoi'r gorau i'w swydd yr haf yma er mwyn symud i fyw i Florence.

Roedd y disgyblion i gyd yn awyddus i ddiolch iddi am ei harweiniad, ac yn sicr fe gafodd hi ddiwrnod i'w gofio.

Dan groen cymeriad
Seren arall y diwrnod oedd Sioned Elin Davies - enillydd y monolog dan 19 oed. Dyma chi hogan sydd yn medru treiddio dan groen cymeriad, ac mae hi'n hawlio eich sylw o ddechrau i ddiwedd perfformiad. Doedd gen i ddim llai na'i hofn hi ar y llwyfan!

Buddugoliaeth Llangynwyd
Ac i gloi - at y bois! Llongyfarchiadau mawr i barti bechgyn Ysgol Gyfun Gymraeg Llangynwyd ar eu buddugoliaeth.

Synnwn i daten na fydd rhai o'r rhain yn aelodau o Only Men Aloud ymhen rhai blynyddoedd.

Wedi'r cyfan, mae eu harweinydd - Nia Edwards - yn briod â Tim sy'n aelod o OMA.

Mae Tim yn gweithio i'r Urdd ac yn un o'r criw gweithgar gefn llwyfan sy'n cadw'r sioe i fynd a fo oedd y cyntaf i longyfarch yr hogia ddoe.