 |
|
Trysor
- wyddor chi
Llyfr newydd hwyliog i helpu plant gael crap ar y llythrenne
Dydd Iau, Tachwedd 14, 2002
|
•
A-Bi-Clec gan Haf Llewelyn. Gwasg Carreg Gwalch.
gan Lowri Rees
O’r diwedd llyfr lliwgar llawn dychymyg am yr wyddor Gymraeg a chyfle
i rieni ac athrawon i gyflwyno llythrennedd i blant heddiw mewn ffordd
hwyliog.
Mae’r llyfr newydd A-Bi-Clec yn gyfle i blant ifanc
gael blas ar yr wyddor Gymraeg drwy gyfrwng straeon a rhigymau.
Hwyliog
Yn ôl yr awdur, Haf Llewelyn o Lanuwchllyn ger Y Bala, mae'n addas
iawn i ddysgu llythrennedd yn yr Ysgol Gynradd ac yn gyfle i wneud
hynny mewn ffordd hwyliog gan ymestyn y dychymyg.
Yn athrawes ac yn fam i bedwar o blant mae Haf wedi gwirioni ar lyfrau
ac yn mwynhau gweld plant yn cael blas ar ddarllen.
"Gan fy mod i’n athrawes ac yn fam mi fydda i bob amser yn gwirioni
pan fydd yna lyfrau plant newydd yn dod i’r golwg, yn enwedig ar gyfer
plant sydd newydd ddechrau cael blas ar ddarllen, pethau ychydig yn
fwy cymhleth, a llyfrau gyda digon o wiriondeb a hiwmor ynddyn nhw."
Nofel hefyd
I’r rheini sydd wedi darllen nofel a ysgrifennodd Haf ychydig flynyddoedd
yn ôl ar gyfer Cyfres y Corryn, mae’n amlwg ei bod yn mwynhau
gwneud i blant chwerthin.
"Mi wnes i ysgrifennu nofelig fechan i gyfres Corryn , o’r enw ‘O!
Mae Mam yn Flin’, flynyddoedd yn ôl. Ond yn fwy diweddar mi wnes i
ysgrifennu pedair stori am freuddwydiwr bach o’r enw Idwal, a’i ddafad
lyweth Rosmari, ac mae’r rheiny wedi eu cynnwys yn y llyfr Syniad
Da Iawn, gol. Myrddin ap Dafydd.
"Mae dwy stori arall am yr un cymeriad i’w cynnwys mewn casgliad arall
o’r enw Syniad Da Iawn 2, gan wasg Carreg Gwalch, cyn y Nadolig,"
ychwanegodd.
Hwiangerddi a straeon
Mae’r llyfr A-Bi-Clec yn gyfle i blant ddysgu drwy fwynhau
a hynny gan bori drwy’r hwiangerddi a’r straeon traddodiadol. Mae’r
llyfr mewn lliw llawn gyda CD o’r testun i gyd-fynd gyda’r llyfr,ynghyd
â phecyn gweithgareddau a fydd yn gymorth i blant sydd yn y cyfnod
hwnnw rhwng mwynhau stori a dechrau darllen.
Yn amlwg mae’n bwysig bod llythrennedd yn cael ei gyflwyno i blant
mewn ffordd hwyliog, ac yn sicr dyma’r llyfr ar gyfer athrawon sydd
yn ceisio denu plant i gael diddordeb yn yr wyddor yn ogystal â bod
yn llyfr defnyddiol ar gyfer y rhieni.
"Roedd ACAC a’i fryd ar gyhoeddi llyfr yn cyflwyno llythrennau’r wyddor
i blant, ynghyd â llyfryn gweithgareddau.
"Fel athrawes roeddwn i bob amser yn gresynu na fyddai yna fwy
o adnoddau ar gyfer dysgu llythrennedd yn yr Ysgol Gynradd, felly
dyna gyfle i fynd ati i lunio un i gyd fynd gyda’r llyfr stori A-bi-clec!
"Bydd y llyfr gweithgareddau allan yn fuan ym mis Tachwedd. Mae’n
llawn o ymarferiadau difyr a defnyddiol ar gyfer dysgu llythrennedd
e.e. chwilio am ansoddeiriau, dysgu treigliadau, canfod odlau ynghyd
â nifer o bethau eraill, a hynny mewn ffordd hwyliog, gan obeithio
y bydd athrawon blynyddoedd 2 a 3 yn cael defnydd ohono," meddai Haf.
Wrth ei bodd yn sgrifennu
"Rydw i wrth fy modd yn ysgrifennu pob mathau o bethau, ac yn arbennig
straeon ar gyfer plant, yn enwedig ysgrifennu am blant sy’n dipyn
bach o gesus!!!
"Rydw i hefyd yn mwynhau barddoni. Ond mi fyddwn i wrth fy modd erbyn
hyn yn cael cyfle i ysgrifennu nofel, mae gen i ddigon o syniadau,
ond amser sy’n brin!"
Disgrifiodd Myrddin ap Dafydd o Wasg Carreg Gwalch y llyfr fel trysor.
"Un o'r pethau amhosib eu cyfieithu o un iaith i'r llall ydi llyfrau
ar yr wyddor. Dyna'r rheswm cyntaf pam fod y bwndel yma yn gymaint
o drysor i siaradwyr ifanc, Cymraeg.
"Mae'r lluniau lliw yn ardderchog, mae perfformiad Catherine Aran
ar y CD yn hudolus, mae'r gweithgareddau yn y llyfr atodol yn mynd
i sicrhau oriau o brysurdeb - ond y wefr bennaf ydi fod Haf Llewelyn
wedi cyfuno llawer o hwyl gyfarwydd yr Wyddor Gymraeg, gyda'i chyfeiriadau
at Fonheddwr Mawr y Bala a Modryb Elin Enog ac ati, gyda straeon a
rhigymau gwreiddiol sy'n gafael yn nychymyg plant yn syth. Mi wyddwn
i y byddai'r llyfr yn glasur cyn iddo weld golau dydd hyd yn oed!'
Ebostiwch eich sylwadau
chi am lyfrau
|
|
|
Gair
am air
Siart
Cymru
Llyfrau
ar y We
Nôl
i'r archif
