 |
|
Lle
rhyfedd efo pobl ryfeddach
Llyfr gwahanol i'r arfer gan T. Llew Jones
Dydd Iau, Tachwedd 21, 2002
|
•
Storiau Cwm-pen-llo gan T. Llew Jones. Gwasg Carreg Gwalch. Ar
gyfer rhai rhwng
Oedran: 7 i 11
Adolygiad: Meirion Puw Rees
Dyma lyfr arall gan yr awdur enwog, T. Llew Jones, ond mae’r llyfr
hwn yn anghyffredin o’i gymharu â’i lyfrau eraill.
Straeon a phosau
Nid un stori sydd yma ond cyfres o straeon, posau, croeseiriau, barddoniaeth
a sgriptiu bychain rhyngddynt ac mae’n wahanol iawn i fformat arferol
yr awdur sef nofel un stori neu gyfres.
Mae’r llyfr yn llawn o weithgareddau difyr a all gadw plentyn yn ddiddig
am oriau. Llyfr hefyd i’w godi a’i roi i lawr ac i ddychwelyd ato
dro ar ôl tro.
Os rhywbeth mae’r dull newydd yma yn gweithio yn dda ac mae’n rhoi
saib i’r darllenwr rhwng bob stori sydd yn gwneud y llyfr yma fwy
diddorol i’r plant llai.
Yn wir mae’r posau yn rhai gweddol syml gyda nifer o groeseiriau hawdd
a phosau geiriau addysgiadol e.e. chwilio am eiriau s’yn gorffen gyda
‘OL’ neu yn dechrau gyda ‘CAR’.
Denu darllenwr
Oherwydd y posau a’r lluniau mae diwyg y llyfr yn ddifyr wrth i chi
ei godi a bwrw golwg sydyn drosto. Mi fasa’n denu darllenwyr nad ydynt
yn hoff iawn o ddarllen llawer o ‘text’ ac yn rhoi blas iddynt ar
waith awdur safonol a all eu hannog wedyn i symud ymlaen i ddarllen
llyfrau mwy swmpus ganddo.
Yn bersonol mi fyddai’n well gen i fod wedi cael mwy o ‘sgwennu, ond
mi allai weld sut y gall hwn apelio at ddarllenwyr mwy ysgafn.
Mae’r scriptiau yn fywiog ac yn hawdd iawn i’w darllen ond hefyd gallai
rhai fod o ddefnydd i athrawon neu oedolion i gael plant i actio.
Straeon syml iawn
Mae T. Llew yn ysgrifennu yn ddiddorol a bywiog tu hwnt mewn dull
sydd yn ddigon hawdd i’r plant ieuengaf ei ddeall ac i gadw sylw darllenwyr
hynach. Yn wir mae storiau Cwm-pen-llo yn rhai syml iawn.
Hanes trigolion pentref Cwm-pen-llo sydd yma gan fwyaf - lle rhyfedd
iawn gyda thrigolion rhyfeddach.
Mae eu bywyd yn rhyfedd a hyd yn oed eu henwau!
Hen ddynes flin, sy’n cwyno am bob dim yw Miss Cweryla fel
mae ei henw yn awgrymu.
Mae enwau y cymeriadau yn syml a rhai y byddai plant ifanc yn gallu
ei darllen heb fawr o drafferth, er engraifft ‘Loncyn’ neu ‘Mog’ ac
fel hefo Miss Cweryla a Mr Cymro-sais maent yn awgrymu
natur y cymeriad hefyd.
Mynd i'r lleuad
Straeon i apelio at ddychymyg plant sydd yma, er enghraifft mae’r
ail stori, Roced Dr Nac, yn sôn am ddyheuad hen wyddonydd i
fynd i’r lleuad.
Ar ei gynnig cyntaf mae’n syrthio i ganol gardd lysiau Mr Cymro-Sais
(pwysigyn y pentref) ond gyda help llaw Loncyn, yr un drygionus yn
y pentref, mae’n llwyddo ar ei ail gynnig, neu ydi o?
Stori chwedlonol ei natur yw Y ‘Peth! ac mae hon yn stori neis
am hanes y Prentis yn plesio’r Brenin, yn y diwedd. ‘Fe deimlai’r
Prentis bach yn hapus iawn.
Ar ôl cael ei ddifrio, ei feio a’i daflu i garchar, dyma fe
nawr wedi cael swydd bwysig iawn gan y Brenin ei hunan!’
Mae digon o hiwmor yma hefyd ac elfen o ‘slapstic’ yn y straeon fel
hefo’r stori gyntaf pan mae Loncyn yn syrthio i’r twll yn y ffordd.
Lluniau cartwn
Dylan Williams ydi’r arlunydd ac mae’r lluniau yma yn rhai steil cartwn
s’yn portreadu y cymeriadau a’r sefyllfaoedd yn dda iawn ac yn ychwanegu
at y stori.
Gan fod y cymeriadau yn rhai od mae’r lluniau ‘caricature’ yn cyfleu
hynny yn dda.
Megis y llun o Mr Cymro-sais , mae’r llun yn ei ddangos mewn
siwt ddu ledr hefo het ‘top’, mae'n dew, yn foliog ac yn smocio sigaret
mewn ‘holder’ ac yn cario copi o’r ‘Times’.
Mae’r llun yma wedi cael ei roi ar gefndir sydd wedi cael ei dynnu
hefo camera, mae’r llun i gyd yn dangos fod ‘Mr Cymro-sais’ yn hunan
bwysig ac yn ddyn busnes trachwantus a dim llawer o ots ganddo am
neb arall.
Gwerth cael golwg arno
I unrhyw un rhwng saith ac unarddeg mae’r llyfr yma werth golwg, ac
os ydych chi’n rhiant sydd yn brysyr ac eisiau difyru eich plentyn
neu ei gael i ddarllen mwy mae’r llyfr yma yn ffordd dda i ddechrau.
Os bydd y posau yn eu diddori byddant yn mynd yn ôl at y llyfr
i’w datrys ac wedyn ella byddant yn dechrau darllen y storiau.
Dydi T. Llew Jones ddim wedi colli ei dalent o ysgrifennu llyfrau
bywiog hefo stroi dda. Doeth fyddai ychwanegu y llyfr diweddara hwn
at y casgliad adref.
Ebostiwch eich sylwadau
chi am lyfrau
|
|
|
Gair
am air
Siart
Cymru
Llyfrau
ar y We
Nôl
i'r archif
