Golygydd Cof Cenedl
Y mae'r Athro Geraint H Jenkins yn frodor o Benparcau, Aberystwyth ac yn awr yn byw ym Mlaen-plwyf Ceredigion.
Fe'i penodwyd yn Gyfarwyddwr y Ganolfan Uwchefrydiau Cymreig a Cheltaidd yn 1993.
Cyn hynny yr oedd yn Athro ac yn Bennaeth Adran Hanes Cymru ym Mhrifysgol Cymru, Aberystwyth. Y mae wedi cyhoeddi dros 30 o lyfrau a thros gant o erthyglau ar amrywiol bynciau.
Y mae wedi cyhoeddi'n arbennig o helaeth ar hanes Cymru yn y cyfnod modern cynnar a'r cyfnod modern.
Yn gredwr cryf mewn prosiectau ymchwil cydweithredol, y mae'n olygydd tair cyfres - Hanes Cymdeithasol yr Iaith Gymraeg, Diwylliant Gweledol Cymru a Iolo Morganwg a'r Traddodiad Rhamantaidd yng Nghymru - a gyhoeddir gan Wasg Prifysgol Cymru.
Y mae wedi ysgrifennu gweithiau arobryn ar Gymru yn y cyfnod modern cynnar, ar grefydd a llenyddiaeth ac ef yw golygydd Cof Cenedl: Ysgrifau ar Hanes Cymru.
Rhwng 1993 a 2007 bu'n Gadeirydd a Chyfarwyddwr Ymchwil Bwrdd Gwybodau Celtaidd Prifysgol Cymru ac fe'i hetholwyd yn Gymrawd gan yr Academi Brydeinig yn 2002 ac y mae ar hyn o bryd yn aelod o Gyngor yr Academi Brydeinig.
Y mae hefyd yn Gymrawd er Anrhydedd Prifysgol Cymru, Abertawe.
Mae wedi darlledu am chwaraeon yn ogystal a phynciau hanesyddol ac ymhlith ei ddiddordebau eraill mae cerddoriaeth a garddio.
