主播大秀

O this is no my ain lassie,
Fair tho' the lassie be:
O weel ken I my ain lassie,
Kind love is in her e'e.

I see a form, I see a face,
Ye weel may wi' the fairest place:
It wants, to me, the witching grace,
The kind love that's in her e'e.

O this is no my ain lassie,
Fair tho' the lassie be:
Weel ken I my ain lassie,
Kind love is in her e'e.

She's bonie, blooming, straight and tall;
And lang has had my heart in thrall;
And ay it charms my very saul,
The kind love that's in her e'e.

O this is no my ain lassie,
Fair tho' the lassie be:
O weel ken I my ain lassie,
Kind love is in her e'e.

A thief sae pawkie is my Jean
To steal a blink, by a' unseen;
But gleg as light are lovers' een,
When kind love is in the e'e.

O this is no my ain lassie,
Fair tho' the lassie be:
O weel ken I my ain lassie,
Kind love is in her e'e.

It may escape the courtly sparks,
It may escape the learned clerks;
But weel the watching lover marks
The kind love that's in her e'e.