Nia yn Abertawe - dydd Llun
Wel dyma ni unwaith eto!! Wir i chi - mae gweithio yn Eisteddfod yr Urdd fel mynd i aduniad teulu - a phawb yn dod ynghyd i ddathlu.
Ac mi ddechreuodd pethau'n dda y bore ma. Y seren gyntaf yn yr Eisteddod eleni oedd Tomi Llywelyn o Ysgol Gynradd Llanrug. Mae Tomi yn eisteddfodwr profiadol iawn - a dim ond chwech oed ydi o!
Mae o hefyd yn gefnogwr tîm pêl-droed Manchester United ond fe aeth o un cam yn well na'r Red Devils drwy gyflawni'r dwbl ac ennill yr unawd alaw werin a'r unawd gerdd dant!
Mae o hefyd wedi ennill trip i Euro Disney, ac fel y gallwch chi ddychmygu roedd o - a'i chwaer Leisa wrth eu boddau!
Chwythwrs o friDwi'n gwybod ein bod ni bob blwyddyn yn tynnu sylw at safon yr offerynwyr ac unwaith eto eleni mae'n rhaid nodi bod y safon yn arbennig.
Ymhlith y cystadleuwyr yn y gystadleuaeth i'r ensemble offerynnol yr oedd Ysgol Gynradd Cwmgors. Hanner cant o blant sydd yn yr ysgol ac roedd 'na naw ohonyn nhw ar y llwyfan heddiw a phob un yn chwythu i'r eithaf!
Steddfod Mam Rŵan ta fel arfer mi fydda i'n edrych ymlaen yn ofnadwy at ddydd Llun cyntaf Eisteddfod yr Urdd - diwrnod y rhai bach. Ond y bore 'ma dyma fi'n deffro a'm stumog i'n troi!
Unwaith eto roeddwn i'n gwisgo fy het 'mam eisteddfodol' gan fod Elin yn cystadlu ar yr unawd piano dan 12 oed.
Fe fuon ni yn y sefyllfa hon y llynedd hefyd - ond eleni cyrhaeddodd Elin y llwyfan!! Wel os oeddwn i'n swp sâl cyn hynny roeddwn i'n waeth byth wedyn!
Diolch byth - fe aeth y perfformiad yn iawn ac roedd hi'n gystadleuaeth dda. Llongyfarchiadau mawr i Dafydd Chapman ddaeth i'r brig - disgybl blwyddyn 4 ydi o yn Ysgol Melin Gruffydd ac mae o'n ymarfer am ddwy awr bob dydd!
Anhygoel!!
Andrea Jones o Ysgol Gynradd y Dderwen oedd yn ail ac, ie, Elin Lloyd Grffiths o Ysgol Gynradd Llanfairpwll yn drydydd.
A dyna ni am heddiw - dechrau da i wythnos brysur!
Nia
