 |
 |
Ar fws ym Marcelona
Ail erthygl gan Lowri Evans, Beulah Castell-newydd-Emlyn, yn dilyn ymweliad â Barcelona.
|
I ddathlu ein bod ar ddibennu ein cyfnod yn fyfyrwyr penderfynodd criw ohonom fynd i Farcelona ar wyliau.
Yn wir, dyma'r cyfuniad perffaith i wyth merch sydd â'u bryd ar wyliau tra gwahanol gan fod yno haul crasboeth, traeth prysur, dinas fywiog a siopau at bob dant - heb anghofio'r Sangria wrth gwrs!
Profiad chwithig i griw o fyfyrwyr yw'r syniad o fynd ar fws gydag ymwelwyr tramor i weld dinas mor cŵl â Barcelona a chyfaddef eu bod yn yr un cae â hwy!
Ond, er fy amheuon ar y dechrau cefais hwyl fawr o'r profiad.
Gyda thocyn bws 23ewro am ddau ddiwrnod roedd hi'n bosib teithio ar y bws ac aros fel y mynnech.
Rhai o brif atyniadau'r daith oedd Sagrada Familia ac El Parc Güell ac rwy'n falch inni ymweld â'r ddau le.
Cadeirlan anorffenedig yw'r Sagrada Familia - breuddwyd yr athrylith o ddylunydd, Gaudi, sy'n cael ei eilun addoli ym Marcelona.
Ond, dros ddwy ganrif a rhagor ers ei farwolaeth mae'r lle yn dal heb ei orffen!
Mae mynediad i'r Gadeirlan yn 10euro gyda'r arian yma yn mynd tuag at gostau adeiladu.
Er i ni fedru gwerthfawrogi cyfraniad yr adeilad i'r ddinas ac i'w phobl, braidd yn siomedig oedd y profiad o fynd i mewn i'r adeilad gan weld ond craeniau, sgaffaldiau a llond sedd fawr o adeiladwyr wrth eu gwaith.
Roedd gerddi Gaudi, El Parc Güell, yn dystiolaeth o'i gyfraniad i'r ddinas ac i'w weledigaeth fel crefftwr.
A'r y ffaith fod y lle wedi ei orffen yn fonws!
Roedd y golygfeydd o gopa'r gerddi yn ddirdynnol, a braf oedd medru edrych i lawr ar y ddinas o'r fan hon.
Roedd mân-werthwyr a masnachwyr ar hyd y lle yn y gerddi, fel ym mhobman ar draws y ddinas a dweud y gwir, a phawb am geiniog o goffrau'r ymwelwyr niferus.
 Wedi gadael y gerddi penderfynwyd fod ymweliad â dau le diwylliannol yn hen ddigon am un diwrnod ac felly aethom yn ôl ar y bws i gael gwydryn o Sangria haeddiannol ar La Ramblas - prif stryd dwristaidd y ddinas a welir ar bron bob cerdyn post o'r ddinas.
Mae hi'n stryd brysur llawn bwytai, mân siopau a phobl wirion wedi'u gwisgo fel cerfluniau!
Unwaith eto, cefas flas ar Barcelona er fy mod ychydig yn bryderus y byddai rhywun yn cipio fy mag unrhyw eiliad!
Cyhoeddir yr erthygl hon fel rhan o gynllun cyfrannu ar y cyd rhwng 主播大秀 Cymru'r Byd ac Antur Teifi. Am fwy o fanylion ac i wybod sut y gallwch ennill £30 am ysgrifennu - Cliciwch
|
|
