Twla'r zapper 'na draw...
Mae'n rhyfedd sylweddoli mai tair wythnos un unig sydd i fynd tan y diwrnod mawr. Dewis Gordon Brown oedd hi i gael ymgyrch (neu o leiaf ymgyrch swyddogol) mor fyr, wrth gwrs. Am wn i roedd a wnelo coffrau gwag y Blaid Lafur a chyfoeth cymharol y Torïaid rywbeth a'r peth.
Mae'r ymgyrch fer wedi ychwanegu at y pwyslais y mae rhai'n ei roi ar y dadleuon teledu. Mae'r syniad taw'r dadleuon fydd yn penderfynnu'r peth yn bur gyffredin o gwmpas lle. Gan fy mod yn gweithio yn myd darlledu efallai y byswch yn disgwyl i mi rhannu'r farn honno. Mae'n ddrwg gen i'ch siomi. Dwi'n gableddus ynghylch y mater hwn gan gredu na fydd y dadleuon yn cael fawr ddim effaith ar y canlyniad os na wnaiff un o'r arweinwyr homar o gamgymeriad.
Wedi'r cyfan yr unig linell mae bron unrhyw un yn cofio o'r dwsinau o ddadleuon sydd wedi eu cynnal yn yr UDA ar hyd y blynyddoedd yw Lloyd Bentsen yn dweud "you're no Jack Kennedy" wrth Dan Quale. Efallai bod yr ymosodiad yn un ysbrydoledig ond mynd yn ôl i Texas gyda'i gwt rhwng ei goesau wnaeth Bentsen ar ôl y bleidlais!
Rwy'n ddigon o sinig ynghylch y rhaglenni yma i feddwl mai am naw o'r gloch bore fory y bydd y stori fawr ynghylch y dadleuon yn dod, nid rhwng hanner awr wedi wyth a deg o'r gloch heno.
Am oddeutu naw bob bore mae bron pob un cyfrifiadur yn adeiladau'r darlledwyr yn seinio i nodi cyhoeddi ffigurau gwylio dros-nos BARB. Mi fentraf swllt y bydd y ffigyrau hynny'n dangos cwymp sylweddol yn nifer y gwylwyr wrth i'r ddadl fynd yn eu blaen ac mai penawdau fel "The Great Switch-Off" fydd ar dudalennau blaen papurau fore Sadwrn!
Golygydd Materion Cymreig y Ö÷²¥´óÐã yn blogio'n rheolaidd ar faterion gwleidyddol Cymru.
