Hedfan - y Sioe Uwchradd
Trosi sioe o'r Saesneg
Trosiad o sioe sydd eisoes wedi ennill ei phlwyf yn Saesneg oedd y Sioe Ysgolion Uwchradd yn yr Eisteddfod.
Addaswyd Feather Boy Nicky Stringer a Peter Tabern i'r Gymraeg gan Lowri Hughes a cefin Roberts gyda Lowri Hughes yn cyfarwyddo hefyd.
Yn addas iawn ar gyfer yr oed drama gerdd bwerus yn ymwneud a bwlio yw Hedfan yn olrhain hanes Robat Nobel (Tomos Wyn) 13 oed sydd yn newid o fod yn geek mwyaf yr ysgol i fod yn llanc ifanc hyderus.
Digwydd hynny yn sgil ei gyfeillgarwch ag Edith (Alys Owen Davies) hen wraig digon surbwch a phengaled y mae'n ei chyfarfod fel rhan o brosiect gymunedol.
Yr oedd nifer o elfennau i gynulleidfa ifanc uniaethu 芒 hwy.
Mae'r ymwneud rhwng hen ac ifanc a phwysigrwydd yr ymwneud hwnnw yn thema bwysig ac yn fodd i dangos beth sydd gan y gwahanol genedlaethau i'w cyfrannu i'w gilydd.
Yr oedd pob cyfiawnhad llwyfannu sioe mor berthnasol ond rhoddwyd fel rheswm arall dros ddewis trosiad o waith Saesneg brinder sioeau Cymraeg tebyg.
Mor wahanol, felly i'r hyn ddigwyddodd yn Eisteddfod Genedlaethol yr Urdd yng Nghaerfyrddin y llynedd lle bu cynhyrchiad gwreiddiol Gymraeg gorchestol gyda pherfformiad ychwanegol yn gorfod cael ei drefnu ar y munud diwethaf.
Mae hwn yn sicr yn faes i'r Urdd fel mudiad ei ystyried yn ofalus a ffrwyno doniau sydd at ei alw.
Yn seiliedig ar nofel gan Nicky Singer comisiynwyd y sioe lwyfan wreiddiol gan Theatr ieuenctid Cenedlaethol Llundain ac yr oedd dros gant o ddisgyblion o bob rhan o Sir Conwy ar y llwyfan ar gyfer y perfformiad Cymraeg nos Sul.
