Ö÷²¥´óÐã

Ond dwi'n cael siom o'r ochr orau unwaith i'w llais unigryw gyhoeddi ei 'helo' yn dawel hyderus ar ben arall y ffôn. Mae'r ddwy ohonom yn rhannu gigl am y ffaith ein bod ni'n rhannu'r un enw, ac yn chwerthin mwy wrth rannu straeon am sut mae rhai pobl yn ei ynganu. Dw i'n closio ati'n barod, ac er ei bod hi'n gantores fyd-enwog, does dim sôn am y strancio sy'n cael ei gysylltu â sêr pop yn perthyn iddi.

Mae Cerys Matthews yn gyfeillgar, addfwyn, siaradus ac yn swnio'n hapus dros ben.

Mae Cerys yn siarad o gartref ei rhieni yn Nhrefin, lle mae'n treulio llawer o' i hamser y dyddie ma. Mae hi wrth ei bodd yng ngorllewin Cymru, ac yn teimlo ei bod hi'n cael llonydd yma, heb orfod cuddio dan gap pig neu wallt ffug rhag cael ei heidio gan ddilynwyr.

Mae'r bobol fan hyn lot gwell na unman arall" meddai Cerys, "maen nhw'n brilliant. Mae gwreiddiau Cerys Matthews yn ddwfn ym mhridd Sir Benfro, er ei bod hi'n rhannu ei hamser rhwng Cymru a Nashville, Tennessee y dyddie ma. Aeth hi yno'r llynedd i recordio ei CD cyntaf fel cantores unigol, sef Cockahoop, ond er ei bod wedi teithio'r byd, ei led a'i hyd, does unman yn debyg i gartref iddi, ac yma mae hwnnw.

Soi'n meddwl bod gorllewin Cymru a Nashville mor wahanol i ddweud y gwir" meddai Cerys. "Beth oedd fwyaf od i fi oedd symud mas o'r ddinas achos bues i'n byw yn Llundain am damed bach, ac mae' n anodd weithie yn Nashville achos yr holl insects a stwff fel'na! Mae cymaint o bethau dwin hoffi am fan hyn - y bobol, y creigiau, y gwynt, y glaw, yr haul a holl hanes y teulu sydd yma. Mae Seth fy ngwr i wedi cwympo mewn cariad gyda'r traeth.

"Fi'n agos iawn at fy nheulu i gyd, ac maen nhw i gyd yn Sir Benfro," meddai wedyn. "Mae'n bwysig iawn i fi fod gyda nhw nawr, fel pawb arall pan maen nhw'n cael cu babi cyntaf hefyd."

Fe ddaeth Cerys i boblogrwydd fel wyneb a llais Catatonia, ond erbyn hyn mae'n canu ar lwyfannau'r byd ar ei phen ei hunan. "Dyw e ddim yn teimlo mor wahanol i fod ar ben fy hunan i fod yn onest" meddai wrth gymharu. "O'n i'n lwcus i allu gwneud lot o bethau tu fas i'r band anyway. Ond mae'n neis nawr bo fi'n cael dewis y caneuon a bo fi'n ysgrifennu nhw i gyd fy hunan hefyd. Ma' music yn teimlo lot mwy naturiol i fi nawr."

Emyn mam-gu
Un o'r caneuon sydd wedi cael llawer o sylw ar ei CD newydd yw'r emyn 'Arglwydd Dyma Fi'. Mae'n un o hoff ganeuon Cerys, ac yn ei hatgoffa o'i mam-gu, arferai ganu'r emyn iddi pan roedd hi'n ferch fach. "Ma llawer yn dweud bo nhw'n dechrau crio pan ma nhw'n clywed hon os odyn nhw'n nabod y gân" meddai, "ac os ydyn nhw ddim yn ei 'nabod hi mae'n nhw'n hollol spell-bound."

Er gwaetha'r enwogrwydd byd-eang sydd wedi dod i'w rhan, dyw Cerys Matthews yn sicr ddim wedi anghofio am ei gwreiddiau, ac mae hi'n dweud y bydd hi "nôl a mlaen yn aml" rhwng Cymru a gweddill y byd o hyn ymlaen. Felly cofiwch gadw llygad ar agor amdani wrth i chi grwydro'r ardal, ac os byddwch chi'n ei gweld, gwnewch yn siwr eich bod yn dweud wrthi eich bod wedi gweld ei llun hi ar glawr Y Cardi Bach!

Y Niti-griti!