 |
 |
|
Medal y Dysgwyr
Dysgu Cymraeg mewn pedair blynedd |
|
|
|
Pan symudodd i Gymru yn 2001 doedd gan Harriet Petty ddim syniad fod yna'r fath beth a'r iaith Gymraeg.
Bedair blynedd yn ddiweddarach mae wedi dysgu'r Gymraeg ddigon da i ennill Medal y Dysgwyr yn Eisteddfod Genedlaethol yr Urdd gyda chanmoliaeth uchel y beirniaid. 
Nid Harriet, 17 oed, yw'r unig ddysgwr yn y teulu. Mae ei chwaer 12 oed, Kate, wedi dysgu Cymraeg, mae Mam yn dysgu a'i thad, sy'n gweithio yng nghanolfan ganser Ysbyty Glan Clwyd wedi dechrau dysgu hefyd.
Yn byw yng Nghaerwys ger Treffynnon ac yn mynychu Ysgol Maes Garmon yn Yr Wyddgrug dywedodd Harriet mai ei hunig ymwybyddiaeth o Gymreictod cyn symud yma oedd enwau timau rygbi fel Llanelli.
"Oherwydd bod Dad yn hoff iawn o rygbi ac yn ei ddilyn ar y teledu roeddem yn clywed enwau fel Llanelli," meddai.
 Dywedodd iddi benderfynu dysgu Cymraeg er mwyn gwneud ffrindiau ac oherwydd y byddai hynny yn rhoi gwell cyfle iddi gael swydd yng Nghymru.
Y pethau sy'n peri'r mwyaf o drafferth iddi gyda'r Gymraeg yw treigladau ac amser gorffennol y ferf. "Ond rwy'n hoffi dysgu am farddoniaeth a'r diwylliant," meddai.
Gan ddweud mai dim ond pedwar oedd wedi cystadlu am y fedal apeliodd Nia Parry, wrth draddodi'r feirniadaeth, am i athrawon iaith gymell dysgwyr i gystadlu.
Ychwanegodd ei bod hi a'r beirniad arall, Nerys Roberts, yn siomedig gyda safon y gwaith  ysgrifenedig yn y gystadleuaeth ond wedi cael pleser arbennig yn siarad â phob un o'r cystadleuwyr.
Wrth sôn am waith Harriet dywedodd fod ei harddull hi "yn rhwydd ac yn hyderus".
"Profiad cwbl wefreiddiol oedd sgwrsio ag Enfys [ei ffugenw] - nid oedd pall ar ei lleferydd," meddai.
Gan gyfeirio at y cystadleuwyr i gyd dywedodd fod gan Gymry Cymraeg bob rheswm dros fawrygu eu hymdrechion sy'n dangos parch at dreftadaeth a diwylliant ieithyddol Cymru.
|
|
|
|
|
|
Ìý
