Ö÷²¥´óÐã

Cap i Mefin
Mae Mefin Davies, Llythyrdy, Nantgaredig wedi llwyddo i ennill ei gap llawn i dîm rygbi Cymru yn Ne Affrica. Mae Mefin wedi cael tymor llwyddiannus eleni gyda thîm Pontypridd ac yn llawn deilwng o gael ei ddewis i fynd ar daith i Dde Affrica.

Mae eisoes wedi bod yn gapten ar Dîm A Cymru ac mae cael chwarae dros ei wlad yn goron ar ei dymor. Mae Mefin yn dilyn ôl troed un o drigolion Nantgaredig sef y diweddar Dr Jones Davies, Erw Lon a thad Henry Jones Davies. Fe chwaraeodd ef dros Gymru hefyd.

Glenys yn is-lywydd
Yn ail mae angen llongyfarch Glenys Thomas, Coedlan Mostyn, Caerfyrddin gan ei bod yn mynd i dderbyn anrhydedd uchaf mudiad Merched y Wawr.

Yn ddiweddar cafodd ei hethol yn is-lywydd y mudiad am y ddwy flynedd nesaf ac yna hi fydd Llywydd Cenedlaethol y mudiad o 2004-2006. Mae hi'n aelod o Gangen Caerfyrddin a chyn swyddog gweithgar.

Mae pawb yn gwybod am wasanaeth clodwiw a diflino Glenys ar hyd y
blynyddoedd i bethau gorau ein cenedl.

Nid yn unig ei bod yn ysgrifennydd Cwlwm ers llawer o flynyddoedd ond mae wedi bod yn ysgrifenyddes Sir Gaerfyrddin o'r Urdd hefyd gyda'r cyfrifoldeb o drefnu'r eisteddfodau sirol ers blynyddoedd maith iawn.

Fel 'tase hynny ddim yn ddigon mae hi'n cymryd rhan flaenllaw ac ymarferol mewn llu o weithgareddau diwylliannol eraill yn lleol ac yn genedlaethol. Mae Glenys yn athrawes yn Ysgol Gyfun Dyffryn Aman. Mae'r gwaith o arwain y mudiad pwysig hwn yn dipyn o anrhydedd.

Rhian yn ennill ysgoloriaeth
Merch arall sydd ag achos i ddathlu yw Rhian Mair Lewis o Idole ger Caerfyrddin.

Mae Rhian wedi ennill Ysgoloriaeth Bryn Terfel am y flwyddyn 2002 mewn cystadleuaeth rhwng saith o enillwyr prif gystadlaethau Eisteddfod yr Urdd Caerdydd a'r Fro, a gynhaliwyd yn Theatr Stanwell, Penarth ar y 29ain Mehefin.

Mae'r ysgoloriaeth yn werth £2000. Darlledwyd y gystadleuaeth ar S4C yn ddiweddar, gyda Gethin Page o Flaenycoed hefyd yn cystadlu.

Cafodd Rhian ei hyfforddi ar gyfer ei buddugoliaeth ar yr unawd allan o unrhyw sioe gerdd yn y genedlaethol gan Marian Thomas, Pennaeth Adran Cerdd a'r Cyfryngau, Coleg y Drindod, Caerfyrddin.

Mae Rhian, sy'n gyn-ddisgybl o Ysgol y Dderwen ac Ysgol Bro Myrddin, yn brysur iawn ar hyn o bryd yn ymarfer ar gyfer cynhyrchiad operatig Coleg Brenhinol Cerdd a Drama Cymru.

Yn y cynhyrchiad hwnnw fe fydd hi'n chwarae un o'r prif rannau yn y sioe Paradise Moscow gan Shostakovich syn cael ei berfformio ddechrau'r mis hwn.

Bydd Rhian yn defnyddio'r arian i gael hyfforddiant proffesiynol pellach yn Llundain.

Llywydd newydd yr Urdd
Yn olaf mae llwyddiant wedi dod i ran merch arall or fro sef Eirith Evans o Flaenycoed. Mae Eirith wedi ei gwneud yn Llywydd yr Urdd am y flwyddyn 2002.

Ers pan yn ifanc iawn bu Eirith yn cystadlu'n gyson yn Eisteddfodau'r Urdd. Mae hi'n berson amryddawn iawn ac mae hi'n athrawes yn Ysgol Gynradd Pontyberem.

Mae hi wrth ei bodd yn crwydro ar draws y byd. Bu'n astudio yn Houston, gweithio yn Awstralia ac arwain trip o aelodau'r Urdd i Dwrci yn ogystal ag ymweld â Lesotho.

Mae Eirith yn cydnabod ei dyled i fudiad yr Urdd ac yn awr yn cael y cyfle i wasanaethu'r mudiad.