 |
 |
Nwdls i frecwast - a swpar efo Duran Duran!
Profiadau Cymraes sy'n treulio dwy flynedd yn athrawes yn China
|
Y mae Delyth Roberts o Sir Fôn yn treulio dwy flynedd yn athrawes Saesneg mewn coleg yn China.
Dyma gyfraniad cyntaf Delyth - neu Dailaisi bellach! - i 主播大秀 Cymru'r Byd yn son am ei phrofiadau.
 Mawrth 1, 2001
Amhosib bwyta noodles heb wneud golwg!
Cyrraedd gorsaf Changsha, prifddinas talaith Hunan, ar amser - 4.10 y bore yn union (ew, profiad braf cael teithio ar drên sy'n cyrraedd ar amser wir!).
Kate a finnau yn gollwng ein bagiau i gyd un wrth un o'r trên a disgwyl ar y platfform am rywun o Goleg Athrawon Yiyang i'n tywys yno.
Buom yn disgwyl am tua deng munud ond tra'n disgwyl daeth nifer o yrwyr tacsi atom i ofyn os oedd angen un arnom.
Dim ots faint o weithiau ddwedes i na, 'roedd pob un ohonynt yn bendant ein bod wir angen tacsi.
Digon teg - 'roedd digon o fagiau o'n blaenau!
Pen hir a hwyr daeth Wang Jun, athro Saesneg, i'n cyfarfod, a dyma stryffaglio at fynedfa'r orsaf.
Yno 'roedd gyrrwr y coleg a chyn-bennaeth yr adran Saesneg a phrin ddigon o le i'r pump ohonom yn y car ar ôl pacio'r bagiau i gyd!
A ffwrdd a ni am westy am weddill y noson.
Ew - 'roedd hi'n braf cael cysgu dipyn er ei bod hi'n rhewllyd a minnau'n disgwyl y byddai'n gynhesach yma nag yn y Gogledd!)
Gwrthod KFC
Codi am tua 11 y bore a chael cynnig mynd i KFC am frecwast (mae prydau cyflym Americanaidd wedi cyrraedd China!) ond y ddwy ohonom yn egluro ein bod yn llysieuwyr felly ffwrdd a ni i gael brecwast Chinese go iawn - powlen fawr o noodles hefo wy 'di ffrio ar ei ben.
'Does dim posib bwyta noodles heb wneud golwg ac mae angen dipyn o amynedd ac ymarfer i'w bwyta efo chopsticks hefyd!
Ar ôl y brecwast Tsineaidd cyntaf, cawsom ein tywys o gwmpas y ddinas. Ymweld ag Amgueddfa Hunan, oedd wedi cau ganol dydd ( China!) ac Ynys Oren sy'n enwog oherwydd i'r Cadeirydd Mao gyfansoddi barddoniaeth am y lle pan yn ifanc.
Wrth inni fynd lawr y lôn tuag at yr ynys nifer o berchenogion tai bwyta yn ceisio stopio'r car trwy sefyll yng nghanol y lôn!
Ar ôl cael cinio - 'chydig o oriau ar ôl brecwast, felly dim rhyfedd bod pobl yn meddwl fod brodorion y wlad yn hoffi bwyta! - aethom tua choleg Yiyang sydd wedi ei leoli yng nghanol y wlad rhyw 80 km o Changsha.
Mae'r coleg tuag ugain munud o ddinas Yiyang hefyd gyda rhyw fath o bentref bychan wedi codi o'i gwmpas. Llond lle o dai bwyta bychain, siopau a marchnad.
Cael golwg ar fy nghartref am y ddwy flynedd nesaf - wel dyna sioc. Fflat cyffyrddus, pedair ystafell, teledu, vcd, peiriant golchi yr un, cyfrifiadur a chegin i'w rhannu.
'Dwn i'm beth oeddwn i'n ei ddisgwyl a dweud y gwir...
Mawrth 2, 2001
Cyfarfod y myfyrwyr - rhai'n siarad yn ddi-baid
Dydd Gwener am wyth, Mr Yang, cyn-bennaeth yr adran Saesneg, yn dod i'n nôl i gael brecwast - y nwdls unwaith eto!
Yna am 8.50 mynd efo Wang Jun i gyfarfod rhai o'r myfyrwyr.
Rhannwyd y dosbarth yn ddau, a thywyswyd Kate a fi o gwmpas y campws gan y myfyrwyr.
Criw reit dda a dweud y gwir. Rhai ohonynt yn siarad yn ddi-baid, eraill yn chwithig a thawel.
Gwelodd y flwyddyn gyntaf ni yn cerdded o gwmpas efo'r drydedd. 'Roedd rhain wrth eu boddau - erioed wedi cael athrawon tramor o'r blaen. Pob wyneb yn dod at y ffenestr ac yn gweiddi "Hello, I welcome you to Yiyang Teacher's College."
'Dwi erioed wedi bod mor boblogaidd!
Baner goch ar y wal
Am bedwar o'r gloch 'roedd cyfarfod gyda phenaethiaid y coleg gyda baner goch ar y wal i groesawu'r ddwy ohonom i Goleg Athrawon Yiyang, a phrif olygydd papur newydd y coleg yno i dynnu lluniau ohonom.
Gwahoddwyd ni i 'wledd' gan Ganghellor y Coleg. Traddodiad Tsineaidd pan yn croesawu rhywun.
Y broblem fwyaf efo'r gwledda yw'r 'baijiu' (llythrennol - alcohol gwyn) a'r 'ganbei' (llythrennol 'sychu gwydr').
Pob tro mae rhywun yn dymuno iechyd da, rhaid sefyll a 'ganbei'.
Rhaid rhoi cnoc sydyn i'r ddiod, sy'n llosgi cefn y gwddf ac yn gadael blas od yn y geg, er mwyn dangos gwerthfawrogiad !!
Help!
Mawrth 3, 2001
Darganfod y wlad go iawn
Dim gwneud rhyw lawer a dweud y gwir ond prynu pethau sydd eu hangen arnom.
Cael pryd allan mewn ty bwyta bychan ar ochr y lôn.
Mae'r perchennog yn byw yn y ty bwyta, uwchben y gegin (darn o'r ty bwyta lle mae'r woc yn cael i gadw!).
Roedd yn ddyn digon croesawgar a chawsom bryd blasus a sgwrs mewn Chinese am 6 kuai (50 ceiniog ballu).
Crwydro o gwmpas y campws wedyn a dod o hyd i siop gwerthu bisgedi (darganfyddiad pwysig!) a'r 'sinema' awyr agor (wal wedi ei pheintio yn wyn).
Mynd am grwydr dros wal y coleg hefyd, a darganfod y wlad go iawn.
Tai bychain, llyn, caeau o lysiau. Rhyw olygfa debyg i'r Tsiena'r ffilmiau, bron fel camu'n ôl mewn amser.
Tair o enethod bach yn penderfynu ein dilyn am ryw reswm.
Cyfarfod athro Saesneg sy'n byw i fyny'r grisiau. Tydi ei Saesneg yntau ddim yn wych er ei fod yn groesawgar iawn.
Mawrth 4, 2001
Gwahoddiad i swper gyda Duran Duran!
Mynd allan am ginio i dy bwyta a chyfarfod nifer o athrawon Saesneg yno.
Erbyn gweld chwaer un o'r athrawon ydy'r perchennog!
Byd bach!
Cael mynd i mewn i'r gegin i ddewis bwyd a gweld hwyaid wedi sychu yn hongian ar y wal yno.
Llun o China go iawn!
Treulio amser maith yma yn siarad efo Kate a'r athrawon Saesneg. Pryd bwyd rhyngddom dipyn drutach yma - 16 kuai (punt pumdeg) am bysgodyn, gwreiddyn lotus a thatws!
'Roedd pysgodyn ar ei ben ei hun bron gymaint â hyn yn Xi'an.
Ganol y prynhawn daeth tri bachgen bach i ymweld â ni. Un ohonynt â Saesneg da iawn.
Y Rhain yn ein gwahodd allan i chwarae felly dyma chwarae allan efo griw o blant bach.
Un bachgen tua phump oed yn dod i chwarae efo ni.
Ddwedwn i mai Zhuang Zhuan ydy ei enw ond mae Kate yn mynnu mai Duran Duran (ia - y grwp!) ydy ei enw, felly dyna fu ei enw gydol y prynhawn.
Cawsom anrhegion fel poteli o fybls gan y plant, a sylw pob oedolyn oedd yn pasio!
Cawsom wahoddiad i dy y bachgen sy'n medru Saesneg, Jerry (mae gan bawb sy'n siarad Saesneg yma enw Saesneg yn ogystal â'i enw Tsineaidd) a chael pryd nos gyda fo a'i rieni.
Ychydig iawn o Saesneg siaradai'r fam ond rhwng fy Chinese i a Saesneg ei mab cawsom ddigon o hwyl.
|
|
