 |
 |
Awchu am Fac arall
Dal i golli bwyd y gorllewin
Dydd Mawrth, Mehefin 5, 2001
|
Mae Delyth Roberts o Sir Fôn yn treulio dwy flynedd yn athrawes Saesneg mewn coleg yn China. Dyma ei chyfraniad diweddaraf i 主播大秀 Cymru'r Byd.
Mai 14, 2001 - heb ddeall y geiriau
Diwrnod digon cyffredin. Poeth iawn (eto!) -'run hen
stori!
Egluro trefn yr arholiad llafar wrth y drydedd - pob un yn edrych yn boenus dros ben! Dysgu idiomau Saesneg iddynt - wrth eu boddau yn dysgu pethau fel hyn.
Mynd i'r llyfrgell gyda'r nos. Wedi gwirio gwaith Susie drosti - safon reit uchel o dweud y gwir. Yr unig broblem yw ei bod hithau a nifer o fyfyrwyr eraill yn defnyddio geiriau nad ydynt yn eu deall!
"Roedd Moffat yno hefyd. Roedd bron a marw eisiau chwarae gwyddbwyll â mi. Pam ddwedais i fy mod yn medru chwarae - ond dwi heb chwarae ers blynyddoedd!
Siarad efo dad ar y rhyngrwyd a chydag athrawes arall yn Hunan. Mae hi'n byw yn Huaihua sydd reit bell oddi yma. 'Rhen beth yn lwcus hefyd - mae yna dy bwyta Brasiliaidd yn y dref - a'r perchenogion yn frodorion o Brasil!
Mai 15 - gwibrau a ras
Tywydd reit drymaidd heddiw. Siwr o fwrw reit fuan.
Cael gwybod bod un o staff swyddfa VSO yn Beijing yn dod yma ddydd Llun i weld os 'di popeth yn iawn yma.
Cael gwybod hefyd fod y Lotus Awards yn Changsha dros y penwythnos - seremoni wobrwyo arbennig i athrawon tramor Hunan i gyd. Bydd car y coleg yn ein danfon yno.
Diwrnod mabolgampau dros y penwythnos hefyd - wel tridia a dweud y gwir! Gobeithio bydd ein ras ar ddydd Sadwrn!
Mai 16 - tipyn o gêm
Gwersi yn y bore a pharatoi rhagor yn y prynhawn. Chwarae cardiau efo'r myfyrwyr yn y llyfrgell - wel maent yn cael ymarfer eu Saesneg!
Dysgodd Kate gwpl o gemau i'r myfyrwyr yna colli pob un ohonynt!
Mai 17- Olympaidd
Bwrw glaw - dim mabolgampau! Mae na seremoni agoriadol a phopeth yn y mabolgampau 'ma. Mae'n swnio'n ddigon tebyg i'r gemau Olympaidd gwir!
Mynd i Yiyang i brynu anrheg pen-blwydd i Kate. Gweld cath fechan mewn bag papur ar y bws a dyn newydd ddod o'r caeau yn gwisgo esgidiau gwellt!
Mai 18 - yn y bag
Gwersi yn y bore. Nifer o fyfyrwyr yn dod i siarad â mi ar ddiwedd y wers. Roedd un ohonynt yn gwrthod siarad a mi ei hun ac yn gofyn i eraill wneud drosti gan nad oedd yn credu bod ei Saesneg yn ddigon da! Be nesa!
Kate a minnau yn mynd i Yiyang i ymweld a'r doctoriaid fu'n rhoi acupuncture i Kate gan eu bod wedi dod i'r coleg i geisio rhoi lluniau iddi yr wythnos diwethaf.
Croesawgar dros ben. Trosi o Saesneg i Chinese dros Kate a'r doctoriaid. Ymarfer da i mi!
Mynd i chwilio am ddyn gwerthu bagiau am fy mod eisiau prynu bag bychan. Dod o hyd i'r stondin ble prynodd Kate fag tua deufis yn ôl a phwy oedd y perchennog ond brawd Ms Shao (yr heddferch!)
Rhoddodd fag i mi am ddim gan ein bod yn ffrindiau.
Cael cinio mewn bwyty ar ochr lôn yn Yiyang. Wel dyna sôn am sylw! Pawb wedi cyffroi yn llwyr o gwmpas yr ardal!
Mai 19 - gwobr i bawb
Mynd i Changsha. Daeth Ms Sha efo ni. Y seremoni mewn gwesty yn y ddinas. Siarad â rhai o athrawon VSO eraill ac erbyn deall mae bron yn amhosibl peidio derbyn gwobr rhyw ben!
Yn y seremoni cawsom berfformiad gan ysgol ddrama Changsha, dan gynnwys Twinkle Twinkle Little Star yn cael ei hadrodd fel barddoniaeth!
Penderfynu aros dros nos yn y gwesty gan fod gweddill yr athrawon VSO yn gwneud hynny. Cost o 168 kuai am y
noson i ddwy ohonom. Talodd y coleg. - bargen!
Kate a minnau yn penderfynu ei bod yn bosibl ymweld â Changsha am y penwythnos yn amlach!
Cael pryd yn lobi'r gwesty - digon o ddewis ond ychydig iawn o ddewis i lysieuwyr. Bwyta nifer o deisennau a llawer o ffrwythau.
Dal tacsi i far Coco yn hwyrach ymlaen. Roedd gyrru trwy Chagsha gyda'r nos yn fy atgoffa o Beijing.
Bar modern, gorllewinol. Allan yn y bar tan oriau mân y bore - ew braf!
Heb sylweddoli faint o hiraeth oedd arnai am dipyn o fywyd nes gadael y coleg wir!
Mai 20 - byrgyr arall
Mynd i siopa efo Kate i'r archfarchnad i brynu bwyd a ballu.
Mynd i McDonalds am ginio - eto! Rhyfeddod. Fyddai byth yn myn yn agos i'r lle ym Mhrydain! Mae'n rhaid fod pethau yn reit ddrwg arnai!
Bron a marw eisiau unrhyw fath o fwyd gorllewinol mae'n rhaid.
Daeth car y coleg i'n nôl ni o'r gwesty. Cyrraedd yn ôl yn y coleg ganol prynhawn a pharatoi rhagor o wersi ar gyfer wythnos nesaf.
|
|
