Ö÷²¥´óÐã

Yn gorwedd yn y gwely yn gwrando ar y newyddion y bore hwnnw, roedd hi'n anodd cymryd y manylion i mewn. Mae 'na ddaeargryn wedi bod... a miloedd wedi marw yn Sri Lanka, India, Indonesia a Gwlad Thai ... bydd rhaid i mi gofio gweddïo dros y sefyllfa yn y gwasanaeth yn yr eglwys y bore 'ma. Dim ond rhai oriau yn ôl, yn chwilio am gyrff eu hanwyliaid, roedd maint y drychineb wedi dechrau suddo i mewn.

Mae'n anodd i ni ddychmygu sut oedd y bobl yn teimlo ar ôl iddyn nhw golli popeth. Mae'r ffaith bod y ddaeargryn wedi taro yn ystod y gwyliau pan roedd pobl o'r wlad hon yn aros yn y gwledydd hyn, wedi gwneud i'r drychineb ddod yn nes adref. Nid rhywbeth sy'n effeithio ar bobl Asia yn unig ydy hon - ond rhywbeth sy'n effeithio arnom i gyd.

Mae'r ffaith bod cymaint o bobl yn y wlad hon wedi rhoi yn hael i apêl y Tsunami yn dangos bod dioddefaint y miliynau wedi cyffwrdd â'n calonnau. Mewn ychydig o amser daeth miloedd o bunnau i mewn, ac aeth llawer o bobl ati i drefnu gweithgareddau i godi arian. Mae rhai wedi bod yn awyddus i helpu trwy gasglu pethau ymarferol - dŵr, bwydydd a meddyginiaeth.

Mae Euryl y gŵr yn Gaplan yn Ysbyty Cyffredinol Gorllewin Cymru yng Nghaerfyrddin. Gwnaeth yr ysbyty apêl am bethau ymarferol, a threfnwyd i ddwy lori fawr gasglu'r rhoddion a'u hanfon i ffwrdd. Ar ôl cyhoeddi'r apêl yn fy eglwysi ar y Sul, daeth llawer o'r plwyfolion i'm swyddfa yng Nghrymych gyda bagiau plastig yn llawn o bethau ymarferol. Aeth tri llond car i lawr i'r ysbyty un bore Gwener, i ymuno â'r bobl eraill a oedd hefyd wedi bod wrthi yn casglu.

Rwy'n siŵr bydd angen help ar y bobl druenus yn Asia am fisoedd eto. Ond mae'r ffaith bod cymaint o bobl yn y wlad hon ac yn yr ardal hon wedi dangos eu parodrwydd i'w helpu yn codi calon rhywun. Mae'r ddaeargryn yn Asia wedi ein hatgoffa ni pa mor ffodus yr ydym ni i fyw yn y wlad hon. Gadewch i ni gyfrif ein bendithion, a pheidio â chwyno am y pethau bychain sydd yn ein poeni, wrth i ni gofio am y rhai sy'n dioddef yn ein byd.

Dan ofal Prosiect Papurau Bro