Ö÷²¥´óÐã

Aeth 42 o ddisgyblion o dan arweiniad Mr. Trystan Pillips, o flynyddoedd 9, 10 ac 11, a Mrs. M. Lloyd, Miss. G. George, Mrs. M. Williams a Mr. P. Higginson. Fe fuom yn aros yn yr Eidal am bump noswaith ac yn teithio am bedwar diwrnod i fynd a dychwelyd. Fe adawon ni Grymych yn llawn hwyl a sbri gan edrych ymlaen am y daith i ddod. Mae'n rhaid dweud mai nid ar fws yw'r lle delfrydol i gael nosweth dda o gwsg!

Fe gyrhaeddon yn Riva del Garda ddydd Mawrth ar ôl 23 awr o deithio ar y bws a phawb yn falch i weld gwesty Alberello o'r diwedd lle byddem yn aros am yr wythnos i ddod. Fe fuom yn ymweld â Verona, Gardaland sef parc antur mwyaf poblogaidd yr Eidal, Limone, Malcesine a Venice.

Trist oedd gwybod y byddai Venice o dan ddŵr mewn rhyw gan mlynedd, a Bascilia San Marco, sef eglwys odidog sydd yn sgwâr St Marc yn diflannu am byth. Ein bwriad oedd mynd i wneud cyngerdd yn yr awyr agored, ond yn anffodus dechreuodd hi fwrw glaw a tharanau. Ond ni stopiodd hyd yn oed y storm bobol Crymych rhag canu! Ar y bws unwaith eto a cheisio chwilio am rhywle i gael mynd i ganu. Yn y diwedd aethon ni mewn i gaffi/ bar a dechrau perfformio gan glywed y glaw a'r gwynt yn taro'r ffenestri ac ambell i daran yn goleuo'r ystafell i gyd. Dyma un o'r profiadau sydd yn mynd i aros gyda ni gyd.

Ar ddydd Sul fe gychwynnon ar ein taith am adref. Doedd neb wir am adael ond roedd pawb yn gwybod bod rhaid dychwelyd i Grymych rywbryd.

Roedd y daith ar ben, pawb wedi blino ac yn drist i weld y daith yn gorffen ar ôl yr holl drefnu a'r paratoi cyn hynny. Fe gawson lawer o brofiadau gwych yn ystod y daith ond yr un sydd yn aros yn y cof i mi'n bersonol ac i nifer o rai eraill siŵr o fod, yw nofio yn llyn Garda. Fe fuon yn ddigon lwcus i gael nofio yn y llyn ddwy waith yn y tywyllwch a dim ond lampau y stryd agosaf a golau'r lleuad yn disgleirio arnom. Roedd y dŵr yn ddigon oer ond fe gofiaf y profiad hwn am byth.

Fe fwynhaodd pawb aeth ar y daith ac fe hoffwn i ar ran y disgyblion ddiolch i'r athrawon am wneud y daith yn hwylus ac yn bleserus i ni ac i Mr. Trystan Phillips am arwain y daith. Yn awr mae pawb yn edrych ymlaen am ddychwelyd i'r Eidal mewn dwy flynedd, ac i unrhyw un sydd yn cael y cyfle i fynd, fy nghyngor i a phawb a fu ar y daith mwy na thebyg yw cymerwch y cyfle ac wnewch chi fyth ddifaru.