|
Yn ddiweddar, dewiswyd Gethin Jones, gŵr ifanc 26ain oed o Gaerdydd fel cyflwynydd newydd ar y rhaglen boblogaidd 'Blue Peter.' Pwy felly yw Gethin Jones? Bu ei dad-cu, sef y diweddar Mr. Thomas Clifford Jones yn Brifathro yn Ysgol Ciliau Parc am 29 o flynyddoedd (1945 - 1974). Roedd yn ŵr llengar a cherddorol, a mawr ei barch yn y gymuned. Ei fab yntau, sef, Mr. Goronwy Jones yw tad Gethin. Yn y flwyddyn 2001 yn ystod cyfnod dathlu penblwydd Ysgol Ciliau Parc yn 125 oed, cawsom yr anrhydedd o groesawu Goronwy, Sylvia ei wraig a'u mab Gethin i'r dathliadau. Mae Gethin yn gerddor dawnus fel ei dad-cu, ei dad a'i fam, ac yn hoff iawn o chwaraeon o bob math. Efallai eich bod yn gyfarwydd a'i weld yn cyflwyno ar raglenni plant S4C megis Uned 5 a Popty. Bydd yn gwneud ei ymddangosiad cyntaf ar 'Blue Peter' ar Ebrill 27ain. Dymunwn yn dda iddo yn y fenter newydd.
 |
Ìý
