|
Mae pobl ardal Rhydaman yn gyfarwydd â Llio Silyn. Hi oedd yn bennaf gyfrifol am y cyflwyniad Ugain Mlynedd Ymlaen yn Theatr y Glowyr gyda ieuenctid yr ardal rhyw ddwy flynedd yn ôl.
Mae'n gefnogwr brwd o Amnest Rhyngwladol ac mae Rhyfel Irac wedi ei dwysbigo i farchogaeth yn enw'r mudiad hwnnw.
"Dw i wastad wedi cefnogi Amnest, ac yn aelod o'r mudiad. O'n i'n meddwl ei bod yn rheitiach hel arian i godi ymwybyddiaeth ac i helpu achosion carcharorion ledled y byd mewn llefydd fel Bae Guantanamo ac Abwgrabi."
Mae'n dilyn ôl traed ei thad. Roedd tad Llio, Silyn Huws, yn ddarlithydd Cymraeg yng Ngholeg Harlech ac yn heddychwr a wrthododd wneud gwasanaeth milwrol yn 1957. Mae'n enedigol o Benrhydeudraeth and erbyn hyn yn byw yn Llandyfan. Mae'n fam i bedwar o blant, yn cyfarwyddo cwmni aromatherapi 'Gwenllian' a gweithio gyda theatr ieuenctid.
Bwriad Llio yw cychwyn o Borthaethwy fis Medi ar daith am 10 diwrnod gan ddiweddu yn Y Fenni. "Dw i am deithio tipyn ar y ffordd fawr, yn ogystal â llwybrau marchogaeth fel bod pobl yn fy ngweld, ac mae croeso iddynt ymuno efo fi. Bydd lori yn fy nilyn a gallaf wedyn ei defnyddio fel swyddfa i hybu gwaith Amnest. Byddaf yn creu safle ar y we."
"Baswn wrth fy modd pe bai pobl yn fy nghefnogi drwy gasglu noddwyr, gallaf anfon ffurflenni drwy e bost...Bwriadaf greu arddangosfa hefyd ac ocsiwn o waith gwahanol artistiaid- boed yn feirdd, cerflunwyr ac ati. Dwi heb ofyn i bawb eto, ond hyd yn hyn mae'r ymateb wedi bod yn gret. Bydden yn creu rhywbeth arbennig ar themau Amnest."
Bydd Llio wedi trefnu bod ffarier ar gael rhag ofn bydd angen sylw ar ei chaseg "Honey". Bydd Llio a Honey yn galw yng Nghaernarfon; Porthmadog, Dolgellau; Machynlleth; Aberystwyth, Llanbed; Caerfyrddin, Rhydaman, Castell Nedd a'rFenni. Ffoniwch 01269 851870 am ffurflen noddi. Gellwch gysylltu â Llio Silyn drwy e bostio: andrew.ogof@btintemet.com
 |
Ìý
