Ö÷²¥´óÐã

Mae'n addas iawn fod Heledd wedi dewis ardal Llandeilo ar gyfer Crwydro gan fod ganddi hi atgofion melys iawn am y dref a theimlad clos iawn at yr ardal o'i chwmpas. Mae'r cestyll naill ben i'r daith yn hen gestyll y Cymry ac mae hynny hefyd yn bwysig iddi yn enwedig o gofio mai Dinefwr oedd cartref yr Arglwydd Rhys.

Mae Heledd yn werthfawrogol iawn o ddylanwad Llandeilo ar ei bywyd cynnar. Cafodd ei magu heb fod ymhell o bentref Bethlehem ac aeth i'r ysgol gynradd yno yn un o ddeunaw o blant - ysgol sydd bellach wedi ei chau. Wedyn aeth i Ysgol Bro Myrddin ac i'r Coleg yn Aberystwyth. Yn yr ysgol yng Nghaerfyrddin mae hi'n sôn am ddau athro dylanwadol. Wyn Jenkins a Tudur Dylan Jones ac mae hi' n eu cofio'n arbennig am eu hanogaeth i ysgrifennu'n greadigol ac yn cofio'r ffydd ddangoson nhw ynddi hi fel disgybl.

Yn y Coleg yn Aberystwyth bu'n astudio Cymraeg a Drama er y byddai wrth ei bodd yn dweud mai bywydeg môr ac anthropoleg oedd ei phynciau ond, chwedl hithau. "Cymraeg a Drama wnes i fel pawb arall!"

Dylanwad arall arni yn y Coleg oedd Huw Meirion Edwards fu yn ei hannog i ysgrifennu'n greadigol ac un o'r uchafbwyntiau creadigol oedd ysgrifennu geiriau emyn gafodd ei chanu yn ei phriodas, oedd yn brofiad gwefreiddiol, meddai Heledd.

Roedd hi'n mwynhau perfformio ac actio a chymryd rhan mewn sioeau cerdd yn y coleg ar ysgol, ond fe wnaeth hynny yn llwyr o'i gwirfodd.

Cafodd Heledd ei swydd gyntaf ym myd teledu fel ymchwilydd ar Bacha hi O'ma, swydd oedd yn golygu mynd i chwilio am gyfranwyr i dafarnau a chlybiau a dwyn perswâd ar bobl hanner meddw a gwaeth i ymddangos ar y rhaglen. Cymysgedd o charm a blackmail meddai hi, oedd yr abwyd gorau. Wedyn bu hi'n gweithio ar raglen Pwy 'Di Pwy'? a dyna pryd cafodd hi gynnig prawf sgrin ar gyfer cyflwyno Uned 5, a dyna lle cafodd hi un o uchafbwyntiau ei gyrfa hyd yn hyn sef taith fythgofiadwy i Lapland i chwilio am Siôn Corn. Mae Heledd wedi gweithio arHeno ac erbyn hyn mae hi'n adnabyddus fel cyflwynwraig ar Wedi 7.

Am fwy o straeon difyr cofiwch wylio Crwydro ar S4C ddechrau 2004.