Ö÷²¥´óÐã

Fel un na fynychodd yr ŵyl yng Nghil- y- cwm o'r blaen - doeddwn i ddim yn siŵr iawn beth i ddisgwyl. Wedi'r cyfan, gŵyl yng nghanol dim un man? - mewn pentre' bach ar gyrion Llanymddyfri - oedd siop ne' dafarn yna? Wel, dyma ffrind yn cael perswad arna i i fynd - ac nid dim ond mynd ond cytuno i weithio tu ôl i'r bar am ychydig orie hefyd. Wel, os cofiwch, roedd mis Gorffennaf yn un go wlyb - oedd isio wellies, dillad glaw, - dim fy syniad i o 'night out' arferol!

Mi gyrhaeddais, roedd hi'n syndod o braf - gwisgais fy sgidie cerdded - wedi'r cyfan - roedd popeth siŵr o fod wedi sychu allan-yn toedd?!! Wel cyrhaeddes y fynedfa - dyna lle roedd Gaynor yn eistedd yn ei Wellingtons a'i thrywsus glaw, uffach o wen fawr ar ei hwyneb a sŵn grêt yn dod o'r babell fawr. 'Dechre yn y bar' medde hi, 'iawn', me' fi, 'ble ma'r bar?', 'Jest draw fynna' - Oedd mi roedd e, ochr arall y mor o fwd. Wel, doedd dim amdani - dwy droed i fewn - a wyddoch chi be' roedd fel bod mewn 'steddfod!

Ces i noson penigamp - cwrdd pobl o bedwar ban byd yn ceisio gofyn am beint yn Gymraeg, gwrando ar amrywiaeth o gerddoriaeth a chyfle i bobl gymryd at y meic a dangos eu talent. Roedd yno naws mor gartrefol, hamddenol a chyfeillgar. Pa ots am y mwd, roeddwn i yma i joio a joio wnes i, ac mi fydda i nôl eto y flwyddyn nesa'. Y cwestiwn yw, a fydd 'na fwy o Gymry yno efo fi?

'Rwy'n ffan mawr o'r ŵyl arbennig yma mae o jest mor lliwgar, ac yn ddathliad hyfryd o gymaint o wahanol fathau o gerddoriaeth o safon uchel o bedwar ban byd. Jazz, gwerin, ska, reggae, bangra, roc,rap/hiphop a DJ's -mae'na rwbeth at ddant pawb- heb sôn am yr amrywiaeth o fwydydd, a stondinau difyr.

Penwythnos grêt i'r teulu, gyda digon o weithgareddau creadigol i gadw'r plant yn ddiddig. Ac wrth gwrs, mae'r cyfan yn digwydd mewn llecyn mor dlws yng Nghil-y-cwm. Profiad hudolus, hyd yn oed yn y mwd a'r baw eleni.

Mae'r math yma o ŵyl hefyd yn fodd i hyrwyddo'r Gymraeg a Chymreictod, gyda'r bandiau gorau yn y sîn roc/gwerin Cymraeg a phob perfformiad drwy'r penwythnos yn cael ei gyflwyno'n ddwyieithog gan yr unigryw 'John Gog' yn ei gilt. -a do, ges innau fy nhynnu mewn i weithio tu ôl y bar yn ystod yr awr Gymraeg. Dewch yno'n llu y flwyddyn nesa' -mae hon yn ŵyl llawer rhy dda i'w cholli.

Llio Silyn