Mae Artswave yn fudiad sy'n hybu cysylltiadau rhwng artistiaid o Iwerddon a Chymru, ac ar 1 Ebrill ro'n i'n ffodus i gael fy ngwahodd i fynd i Waterford gyda nhw. Y bwriad oedd perfformio ac ysgrifennu caneuon gyda chyfansoddwyr Gwyddelig yno, ac yn cadw cwmni i fi roedd Hefin a Steve o Mattoidz a Fflur Dafydd o'r Panics.
Wrth adael ar y fferi o Ddoc Penfro gyda fy ngitâr yn fy llaw, doeddwn i ddim yn rhy siŵr beth oedd yn fy nisgwyl!
Pwy welsom ni yn cerdded i lawr prif stryd Waterford ar ôl cyrraedd, ond y tri bardd Geraint Lovgreen, Myrddin ap Dafydd ac Ifor ap Glyn. Ar ôl sgwrs, dyma ddarganfod ein bod ni i gyd yn perfformio yn yr un gig y noson honno!
Cynhaliwyd y gig mewn ystafell fechan uwchben tafarn bach clyd y Phil Grimes ac er bod y beirdd wedi cyflwyno popeth yn Gymraeg, roedden nhw hefyd wedi cyfieithu eu gwaith er mwyn i'r gynulleidfa fod yn rhan o'r holl brofiad. Ein cyfle ni i berfformio oedd hi wedyn ac fe gawsom ymateb brwdfrydig iawn. Roedd hi'n braf gweld bod nifer o bobol ifanc yno ynghyd â phobol hŷn ...a fyddai hyn wedi digwydd nôl gartref?
Dyma drosglwyddo'r awenau i gerddorion ifanc Waterford wedyn, a'n cyfle cyntaf i glywed y Gwyddelod roedden ni'n mynd i weithio gyda nhw dros y diwrnodau nesaf.
Dechreuais boeni wrth glywed y cerddor cyntaf - roedd y safon yn anhygoel! Ro'n i'n poeni y bydden nhw'n cymryd popeth yn rhy ddifrifol ond cawsom wybod yn ddigon cyflym - diolch byth - nad oedd hynny'n wir o gwbl! Aethom gyda'n gilydd i glwb nos i gloi'r noson - am brofiad swreal iawn - dawnsio i gerddoriaeth U2 gyda thri bardd o Gymru yn Waterford!
Fe wnaethom ni dreulio diwmod wedyn yn cyfansoddi cerddoriaeth gyda'n ffrindiau newydd o Iwerddon a chyda'r nos aethom i dafarn y Munster roedd barddoniaeth a cherddoriaeth draddodiadol Wyddelig yn cael eu perfformio.
Cawsom wahoddiad arall i berfformio yno, ac unwaith eto cawsom ymateb brwd a llawer o hwyl mewn awyrgylch anffurfiol a chyfeillgar iawn. Daeth y noson i ben gyda Hefin yn canu'r trydydd pennill o Sosban Fach wrth i oleuadau'r bar gael eu diffodd!
Yn dilyn diwrnod cyfan arall o gyfansoddi, daeth y cyfle i ni wrando ar ganeuon ein gilydd am y tro cyntaf. Roedd y canlyniad yn sioc i bawb! Llwyddwyd i greu dros ddeg cân newydd rhyngom ac roedd y safon yn uchel wrth ystyried prinder amser.
Bu'n fraint mynd i Waterford a rhannu cwmni gyda'r Gwyddelod - a'r Cymry yno! Fe wnaethom ni ddysgu llawer am ein gilydd, ac ers cyrraedd adref mae pawb wedi bod yn cyfansoddi mwy - wedi eu hysbrydoli gan y daith mae'n siŵr!
Roedd hi'n braf chwarae o flaen cynulleidfaoedd oedd yn gwerthfawrogi perfformiadau o gerddoriaeth fyw wreiddiol hefyd.
Ry'n ni'n gobeithio trefnu bod y Gwyddelod yn dod atom ni cyn hir ac yn gobeithio cynnig, croeso tebyg iddynt - felly cadwch lygad ar agor am bosteri i'r gigs!
Ìý
