|
Ar brynhawn Sadwrn, Mai 2, roedd yna ddathliad arbennig ar Barc y Bryn, pan ddaeth aelodau o'r tîm llwyddiannus a enillodd Pencampwriaeth Undeb Rygbi Gorllewin Cymru i Gwmllynfell nôl ar ddiwedd y tymor 1958-59. Capten y tîm arbennig hwnnw oedd Royden Morgan, ac mae'n dal cysylltiad o hyd â'r clwb presennol, gan mai Royden yw Cadeirydd y clwb. Roedd y tîm hwnnw nôl hanner canrif yn ôl wedi cyflawni camp arbennig, gan iddynt ennill y Bencampwriaeth dair gwaith mewn pedwar tymor - arbennig iawn.
Daeth rhyw 16 o'r garfan ynghyd ar Fai 2 i hel atgofion am y cyfnod mwyaf llewyrchus yn hanes Clwb Rygbi Cwmllynfell.
O ran y tîm presennol sy'n chwarae yn yr Adran Gyntaf (Gorllewin), bu wythnosau ola'r tymor yn rhai pryderus a chyffrous a dweud y lleiaf. Gyda 6 gêm cyn diwedd y tymor, roedd y tîm yn gwynebu gostwng i'r Ail Adran. Ond roedd pedair o'r gemau i'w chwarae gartref ar Barc y Bryn, ac roedd cefnogwyr mwyaf teyrngar y clwb yn ffyddiog gan fod record dda ganddynt gartref, ac felly y bu. Yn ychwanegol, llwyddasant i faeddu Hen-Dy Gwyn (Whitland) ar eu tomen eu hunain, ac wrth drechu Corws, Maesteg, Llangennech ac Athletig Caerfyrddin gartref, sicrhawyd y byddai Cwmllynfell yn parhau yn yr Adran Gyntaf y tymor nesaf. Da iawn, fechgyn.
 |
Ìý
