|
Yn gynnar ar yr unfed ar ddeg o Chwefror, cychwynnodd rhai o ddisgyblion Maes yr Yrfa ar daith i Lundain er mwyn gweld perfformiad Gwion o'r sioe gerdd 'Oliver!'. Cyrhaeddon yn Llundain am tua hanner awr wedi unarddeg a chael cyfle i grwydro 'Covent Garden'.
Fe wnaethom ymgynnull am hanner awr wedi un er mwyn cerdded i theatr Royal Drury Lane i weld perfformiad matinée o 'Oliver!'. Roedd y llen i fyny a phawb yn gyffrous wrth weld tua chant o blant wedi'u gwisgo fel plant amddifad yn cerdded i'r llwyfan, wrth ganu 'Food Glorious Food' - roedd yr awyrgylch yn rhagorol.
Ar ôl golygfeydd arbennig, daeth Gwion (Oliver) i'r llwyfan ac roedd pawb yn gweiddi a sgrechian. Cyn hir, tro Rowan Atkinson a oedd yn actio Fagin ydoedd i ymddangos. Cafodd gymeradwyaeth wrth gerdded i'r llwyfan.
Yna, sgipiodd Nancy (Jodie Prenger) i'r llwyfan gan ganu.
Wrth i'r sioe ddod i ben a phawb yn cymeradwyo, aethon ni i gyd i ddrws y llwyfan er mwyn llongyfarch Gwion. Syrpreis hyfryd oedd gweld Jodie Prenger yno hefyd, a buom yn ddigon ffodus i gael ei llofnod. Yn anffodus, bu'n rhaid i ni adael Llundain wedyn er mwyn cychwyn ar ein taith nôl i Faes yr Yrfa. Diwrnod i'w gofio!
 |
Ìý
