|
Awduron y sgript oedd y Prifeirdd Tudur Dylan a Cefin Roberts a chyfansoddwyd y gerddoriaeth gan Gareth Glyn. Cyflwynwyd y fersiwn fodern hon o hanes Magdalen gan drawsdoriad o ddisgyblion yr ysgol o dan arweiniad campus Pennaeth yr Adran Ddrama, Mrs. Carys Edwards, a Mrs. Nikola Roderick, Pennaeth yr Adran Gerdd. Cafwyd perfformiadau egnïol a lliwgar wrth i ni ddilyn Magdalen drwy gyfres o brofiadau - yn un o gang y stryd, yn Ilercian yn ardal golau coch y puteiniaid, yn y salon wrth ei gwaith ac yn ei chyfeillgarwch agos â Hedd. Roedd y lliw, y symud a'r emosiynau amrywiol yn y golygfeydd hyn yn adlewyrchu realiti bywyd mewn gwahanol agweddau o fywyd ein cymdeithas gyfoes. Neges y cynhyrchiad yn sicr oedd holed pawb ei hun. Roedd y perfformiad yn rhoi digon o gyfle i bawb fyfyrio a chnoi cil ar broblemau cyfoes. Cludwyd y gynulleidfa o'r stryd i gapel Seion, o'r salon i fywyd digyfeiriad y gang o bobl ifanc ar y stryd, o fywyd y strydoedd cefn i aelwyd anghynnes mam Magdalen. Ynghanol y difrifwch roedd y gynulleidfa yn ymateb i ffraethineb y cymeriadau a doniolwch y natur ddynol mewn rhai sefyllfaoedd! Roedd y canu a'r symud yn wirioneddol wefreiddiol gyda chyfraniad trawiadol o effeithiol gan y band a oedd yn cynnwys disgyblion, athrawon teithiol a thri o athrawon yr ysgol. LLongyfarchiadau i bawb - yn actorion, cantorion, dawnswyr, cerddorion a staff - am berfformiadau arbennig o gaboledig. Dyma sylwadau rhai o'r bobl ifanc fu'n perfformio yn y sioe gerdd: Gwenan Thomas
Fe wnes i fwynhau'r canu, dawnsio ac actio. Roedd y sialens o gymeriadu cymeriad creulon yn brofiad newydd. Roedd y sioe yn rhoi cyfle i wneud mwy o ffrindiau!! Diolch am y cyfle. Heulwen Beasley
Roedd y sioe yn brofiad anhygoel. Fe ges i wefr ac rwyf wedi dysgu llawer amdanaf fy hun ac eraill. Mae wedi bod yn gyfle i mi gymdeithasu ac rwy'n methu aros am y sioe nesaf! Fe wna i gofio'r profiad am byth! Sara Herbert Evans
Roedd bod yn y sioe 'Magdalen' yn brofiad arbennig. Mae'n deimlad anhygoel i fod ar y llwyfan gyda phawb yn eich canmol. Methu aros tan y sioe nesaf! Mae mwy o luniau a sylwadau'r cast yn rhifyn Rhagfyr o Bapur y Cwm. Fuoch chi'n gweld perfformiad o Magdalen? Beth oedd eich barn - rhowch wybod i ni isod!
 |
Ìý
