Llysgenhadaeth yr Ariannin yn Llundain
Ymhlith y negeseuon a dderbyniwyd yn dymuno'n dda i'r seremoni dadorchuddio model o'r Mimosa yn Lerpwl Medi 27, 2008, yr oedd un oddi wrth Enrique Ferrer-Vieyra, Chargé d´Affaires yn Llysgenhadaeth yr Ariannin yn Llundain.
Mae ef hefyd wedi tynnu sylw Swyddfa Dramor yr Ariannin at y digwyddiad a'r Llywodraeth a hithau yn ei thro Lywodraeth Talaith Chubut.
Mewn ebost at Susan Wilkinson, awdur llyfr am y Mimosa cyfeiriodd ef at y cysylltiad sy'n bodoli rhwng Cymru ac Ariannin yn dyddio'n ôl i 1850au y bedwaredd ganrif ar bymtheg a hynny'n arwain at fordaith hanesyddol y Mimosa yn 1865.
"Heddiw," meddai, "143 o flynyddoedd wedi dyfodiad y Mimosa i'r arfordir a alwyd gan y bobl ar ei bwrdd yn Borth Madryn - Puerto Madryn - yr ydym yn falch o gyfrif ymhlith ein cyd ddinasyddion ddisgynyddion y gwladfawyr Cymreig hynny a lwyddodd i gadw dros y blynyddoedd yr iaith a'r diwylliant Cymraeg tra ar yr un pryd yn dod yn Archentwyr llawn ac yn rhan o fywyd pob dydd ein gwlad."
Ychwanegodd:
"Dymunaf i chwi a Chymdeithas Etifeddiaeth Cymru Glannau Mersi y llwyddiant mwyaf gyda'ch cynllun."
Derbyniwyd hefyd nifer o negeseuon o'r Wladfa ei hun fel a ganlyn:
Dewis addas
Llongyfarchiadau i Mrs Elan Roberts de Jones, gynt o Ddyfryn Camwy, sydd yn mynd i fod yn dadorchuddio y model newydd sbon o´r Mimosa yn yr Amgueddfa Forwrol yn Lerpwl.
"Mae yn addas iawn mai hi sydd yn gwneud y gwaith yma gan ei bod yn un o ddisgynyddion Edwin Roberts oedd yn croesawu y Mimosa a´r Hen Wladfawyr ym Mae Newydd yn 1865.
Luned González
Gaiman.
Cymdeithas Gymraeg
Mae enw y llong Mimosa yn adnabyddus yn Chubut.
Rydym ni oll yn cofio ei mordaith hanesyddol i'r Bae Newydd efo'r Hen Wladfawyr ar ei bwrdd.
Rydym yn teimlo yn falch iawn bod model newydd sbon o'r llong dyngedfennol hon yn cael ei ddangos yn Amgueddfa Forwrol Lerpwl a rydym yn eich llongyfarch am wneud hyn yn bosibl.
Lucio González Roberts a Margretta Evans Meza Leiz
Ysgrifennydd a Chadeirydd Cymdeithas Gymraeg Addysg a Diwylliant Camwy - Gaiman.
Cyfarchion o'r Andes
Cyfarchion o'r Andes oddi wrth y Gymdeithas a'r Ysgol Gymraeg yn Esquel ar achlysur dadorchuddio cerflun yn coffáu taith y Mimosa yn cario'r gwladfawyr cyntaf o Lerpwl i Batagonia ym1865.
Yr oedd yn dda gennym glywed am yr achlysur llawen hwn ac fe gawsom drafodaeth ddifyr amdano yma yn yr ysgol.
Yn ystod y drafodaeth hon fe ddaeth i'r amlwg fod Aaron Jenkins, a oedd ar y Mimosa ar y fordaith honno, yn hen daid i Esther Evans de Hughes, sydd yn byw yma yn Esquel heddiw, rhywbeth oedd yn dod â'r achlysur yn fyw iawn i ni.
Felly fel disgynyddion balch i'r holl wroniaid hynny, dynion a merched, a ddaeth o'r Hen Wlad i sefydlu'r Wladfa yma ym Mhatagonia yr ydym yn anfon ein cyfarchion a'n dymuniadau gorau atoch.
Gill Stephen
Tiwtor
Ysgol Gymraeg yr Andes
Cyfarchion Trevelin
Ar ran trigolion Trevelin, Cwm Hyfryd, ein llongyfarchiadau am ddadorchiddio cofeb i Mimosa, y llong a ddaeth a'n cyndeidiau o Gymru i ymsefydlu yn yr ardaloedd hyn.
Pob llwyddiant yn y dathliadau, a chofion cynnes.
Mary Green
Trevelin
Ysgol Gymraeg Trevelin
Cyfarchion cynnes oddi wrth Ysgol Gymraeg Trevelin, Cwm Hyfryd, ar gyfer dadorchuddiad y model newydd o'r Mimosa yn Amgueddfa Forwrol Lerpwl ar Fedi 27.
Hwyliau da i chi gyd!
Gwyn Jones
Ysgrifennydd Pwyllgor Ysgol Gymraeg Trevelin.
Ysgol Gymraeg Esquel
Hoffwn anfon cyfarchion ar ran Ysgol Gymraeg Esquel a mi yn bersonol ar y dadorchuddiad o'r model o'r Mimosa yn Liverpool ar y penwythnos nesaf. Pob llwyddiant i chi ar achlysur mor bwysig i ni i gyd fel Cymry.
Cofion cynnes.
Gladys Jones.
Esquel.
Cyfarchion Toronto
Ar ran Cymry Toronto a'r cylch dymunaf longyfarch Cymdeithas Etifeddiaeth Cymry Glannau Mersi ar yr achlysur pwysig hwn.
Mae'r Mimosa a'r fenter i'r Wladfa yn rhan anhepgor o'n hanes ni a diolch i chi am ganolbwyntio hynny drwy archebu cerflun o'r llong.
Pob lwc i chi i gyd.
Hefina Phillips
Toronto.
Cymdeithas Dewi Sant
Dymuna Cymdeithas Dewi Sant,Trelew, Chubut, Patagonia, Argentina, anfon ein llongyfarchiadau cynnes i´r Pwyllgor sydd wedi trefnu arddangosfa lle bydd cerflun o long fach y Mimosa yn y Merseyside Maritime Museum.
Gwethfawrogwn yr anrhydedd ar parch tuag at y Mimosa a gludodd dros gant a hanner o Gymry i ymfudo dros Fôr Iwerydd, i gyrraedd Porth Madryn yn 1865.
Nid yn unig mae´r antur yn bwysig i ni'r disgynyddion ond hefyd i´r Wladfa fach a holl Wlad Ariannin sydd yn edmygu y sefydliad heddychol i boblogi a throi y diffeithwch yn ddyfryn gwyrdd. Agorodd hefyd y ffordd i sefydlu diwylliant a iaith Hen Wlad ein tadau a chreu cymdithas glos i gadw ein holl draddodiadau gwerthafwr.
Mario Jones, Ysgrifenydd;
Ansel René Davies, Llywydd;
Wendell Davies, Is -Llywydd.
|
