|
Nos Iau, 14 Gorffennaf 2005, gwelwyd Capel Pengarnedd, Rhosgoch yn llawn i'r ymylon o aelodau, cyn-aelodau a chyfeillion a oedd wedi ymuno i ddathlu canmlwyddiant corffori'r eglwys.
Croesawyd pawb yn gynnes gan Mrs Ann Lewis, Llywydd y cyfarfod. Cymerwyd y rhannau arweiniol gan Mrs Gwenda A. Williams, yna estynnodd Ann Lewis groeso arbennig i Lywydd Henaduriaeth Môn, Mr Dafydd H. Roberts; yr Ysgrifennydd, Mr Ted Huws B.Sc.; Llywydd Cyfarfod Dosbarth Amlwch, Mr John C. Jones a'r Ysgrifennydd, Mr Owen Jones hefyd dau gyn weinidog yr eglwys, y Parchedig Fred Hughes, a Mrs J. Hughes a'r Parchedig Dafydd Rees Roberts B.Sc., B.D., a'r pregethwr gwadd, y Parchedig Emlyn Richards B.A., B.D. Cyflwynodd y Llywydd Flaenoriaid presennol yr Eglwys, sef Mr Owen Jones (1955), Mr E. O. Jones (1962), (yn anffodus dydi iechyd Mr Jones ddim wedi bod yn arbennig o dda yn ddiweddar ac nid oedd yn gallu bod yn bresennol yn y cyfarfod ond anfonwyd ein cofion cynhesaf ato), Mr John R. Williams (1962) Mrs Eirlys M. Jones (2002), Mr Owen Glyn Jones (2002), ac Mr William Jones (C) (1978).
 Cafwyd peth o hanes yr Eglwys o'r corffori'r yn 1905 hyd 1955 gan Mr John R. Williams ac yna yn dilyn yr hanner canrif ddiwethaf gan Mr Owen Jones sydd wedi bod yn aelod yn Rhosgoch ers 1949. Braf iawn oedd cael cwmni y ddau gyn weinidog a buont yn hel atgofion am eu cyfnod yn Rhosgoch. Y Parchedig Fred Hughes o 1956 hyd 1974 a'r Parchedig Dafydd Rees Roberts o 1977 hyd 1986 - yr unig ddau yn ystod y ganrif - mae'r Eglwys yn ddiweinidog ers dros ugain mlynedd ond yn dal i ymlafnio'n 'mlaen. Cyflwynodd y Llywydd, y Parchedig Emlyn Richards gan fanteisio ar y cyfle i ddiolch iddo am ei wasanaeth a'i gefnogaeth i'r achos yn Rhosgoch dros y blynyddoedd. Yn ôl yr arfer cafwyd pregeth ardderchog a phwrpasol i'r achlysur. Yr organydd oedd Ann Lewis. Diolchodd Mr Owen Glyn Jones i bawb a oedd wedi cymryd rhan ac wedi gweithio i sicrhau llwyddiant y noson, hefyd i Mr Dei Owen a theulu Rhos Engan am ganiatáu inni gael defnyddio cae gerllaw i hwyluso gyda pharcio. Yn dilyn y cyfarfod trwy garedigrwydd y Llawfeddyg, Mr Huw Griffith a Mrs Jane Griffith croesawyd pawb i Glasgraig i gael lluniaeth. Roeddynt ynghyd â merched Pengarnedd wedi darparu'n helaeth ar gyfer pawb. Hefyd cafwyd cacen pen blwydd wedi ei gwneud a'i haddurno gan Miss Rhiannon Jones. Diolchodd Ann Lewis yn gynnes iawn i Mr a Mrs Huw Griffith am eu croeso a chyflwynodd dusw o flodau i Mrs Griffiths fel arwydd o'u gwerthfawrogiad.
 |
Ìý
