Gŵyl ffilmiau myfyrwyr
Bydd rhewgell yn datrys problemau myfyriwr trwy sgrifennu traethawd coleg ar ei ran mewn ffilm newydd - sydd wedi ei gwneud gan fyfyriwr o Gymru.
Bydd The Fridge i'w gweld mewn gŵyl ffilmiau newydd sydd i'w chynnal ym Mangor.
Yn yr ŵyl dangosir ffilmiau wedi eu creu gan fyfyrwyr ym Mhrifysgol Cymru, Bangor ochr yn ochr â ffilmiau o rai o brif ysgolion ffilm y byd a ffilmiau sydd newydd gael eu dangos yn rhai o'r prif wyliau ffilm rhyngwladol.
Dangosir y ffilmiau yn Theatr Gwynedd ddydd Sul, Mai 15, 2005.
Sgwennu traethawd
Yn y bore, pan ganolbwyntir ar wneuthurwyr ffilmiau sy'n dechrau dod i'r amlwg, dangosir ffilm gan Dafydd Launder, myfyriwr ym Mhrifysgol Cymru, Bangor.
Roedd ei sgript ar gyfer The Fridge yn un o dair buddugol mewn cystadleuaeth flynyddol sgriptio ffilmiau, Prifysgol Cymru, Bangor, a noddir gan Final Draft Screenwriting Software.
Ffilm yw hi am fyfyriwr sy'n methu'n lân a symud ymlaen wrth ysgrifennu traethawd ar 'ddefnydd Shakespeare o atalnodi i gyfleu ymdeimlad o drasiedi sydd ar fin digwydd.'
Yn y ffilm gomedi daw hen ffrij yn llety'r myfyriwr i'r adwy trwy ysgrifennu'r traethawd drosto!
Hefyd yn cael ei dangos yn yr ŵyl bydd Radio Hell a enillodd yr ail wobr yn y gystadleuaeth i Siobahn McCarthy a Hypno-Hip-hop y cymeradwywyd sgript Rory Mathieson iddi.
I'r gogledd
Cyfarwyddwr yr Å´yl yw Julie MacLusky, Darlithydd Ysgrifennu Creadigol yn y Brifysgol.
"Mae'r diwydiant ffilm yng Nghymru'n rhywbeth sy'n perthyn i'r de i raddau helaeth; gobeithio y bydd yr ŵyl ffilmiau hon yn rhoi gogledd Cymru'n ôl ar y map," meddai.
"Yn ogystal â rhaglen o ffilmiau byr arloesol, bydd sesiwn diwedd y pnawn yn dangos sut mae ffilmiau'n cael eu gwneud, tra bydd y sesiwn gyda'r nos yn canolbwyntio ar ffilmiau dogfen dadleuol."
Ychwanegodd fod "cenhedlaeth nesaf gwneuthurwyr ffilmiau a chyfarwyddwyr gwledydd Prydain" yn cael eu meithrin ym Mhrifysgol Cymru, Bangor.
"Mae'r myfyrwyr wedi meistroli elfennau sylfaenol sgriptio ffilmiau, llunio fframwaith stori a chreu cymeriadau a drama grymus.
"Gyda'r traddodiad dweud storïau cyfoethog iawn sydd yn y rhanbarth a thwf cynhyrchu ffilmiau yn yr ardal, gall yr ŵyl hon fod yn newyddion da yn wir. Bydd yn gyfle gwych i ddathlu doniau, a datblygu cysylltiadau gwaith," meddai.
Yr Å´yl
Gall unrhyw un fynychu'r ŵyl rhwng 11.00 y bore a 10.00 y nos ac ar ôl i'r gwahanol ffilmiau gael eu dangos bydd trafodaeth.
Pris tocynnau ydi £3.50 (oedolion) i weld ffilmiau unigol a £7.50 am docyn diwrnod.; £2 a £3 i fyfyrwyr.
Swyddfa docynnau - 01248 351708.
Hon fydd gŵyl ffilmiau ryngwladol gyntaf y coleg o ffilmiau annibynnol a ffilmiau gan fyfyrwyr.
Cafwyd nawdd gan Sgrin, y sefydliad datblygu ffilmiau Cymreig, a'r Final Draft Screenwriting Software.
 |
Ychwanegwch eich sylwadau i'r dudalen fan hyn:
|
|
 |
|
|
